Í liðinni viku fundaði Velferðarnefnd Alþingis. Meðal dagskrárefna, samkvæmt fundargerð, var þingsályktunartillaga sem þingflokkur Samfylkingarinnar lagði fram í september síðastliðnum. Kveður tillagan á um að tannréttingar barna verði gerðar gjaldfrjálsar og heilbrigðisráðherra verði falið að leggja fram frumvarp þess efnis eigi síðar en í maí 2023. Tillagan var einnig lögð fram á síðasta þingi en náði ekki fram að ganga.
Meðal þeirra aðila sem sendu umsögn um þingsályktunartillöguna er Tannlæknafélag Íslands. Í umsögninni kemur fram að félagið styðji tillöguna eindregið. Um sé að ræða mikið réttlætismál. Tannréttingar barna séu hluti af heilsufari þeirra og lýðheilsu sem stjórnvöldum beri að huga mun betur að. Sé tannréttingum ekki sinnt geti það haft alvarlegar afleiðingar fyrir heilbrigði og sjálfsmynd viðkomandi barns.
Í umsögninni segir einnig að tannréttingar barna á Íslandi séu ekki niðurgreiddar nema að litlu leyti og því sé ljóst að efnaminni fjölskyldur geti ekki oft leyft sér að fara með börn sín í tannréttingameðferð. Það feli í sér óásættanlega mismunun.
Samkvæmt Tannlæknafélaginu er komin góð reynsla á samninga um gjaldfrjálsar tannlækningar fyrir börn. Innleiðingu gjaldfrjálsra tannlækninga fyrir börn lauk að fullu í upphafi árs 2018 en þó ber að taka fram að greiða þarf árlegt 2.500 króna komugjald. Segir í umsögninni að tannheilsa barna á Íslandi hafi batnað mikið eftir að þessir samningar voru innleiddir.
Tannlæknafélagið vekur í umsögninni athygli á því að árlega séu um 5000 börn sem nýti ekki rétt sinn til gjaldfrjálsra tannlækninga. Ýmsar ástæður geti verið fyrir slíku en stjórnvöldum og tannlæknum beri að ná til þessara barna eða eins og segir í umsögninni:
„Um er að ræða skýlausan rétt barns til heilbrigðisþjónustu /tannlækninga sem er í raun ekki virtur.“
Lýsir félagið sig reiðubúið til að ræða þetta mál við velferðarnefnd.
Undir umsögnina skrifar formaður félagsins, Jóhanna Bryndís Bjarnadóttir tannlæknir.
DV hefur leitast eftir því að spyrja Jóhönnu nánar út í þessa staðreynd að 5000 börn nýti ekki þennan rétt sinn til gjaldfrjálsra tannlækninga en svör hafa enn sem komið er ekki borist.
