Lögreglan í Berlín í Þýskalandi hefur hafið rannsókn á tónlistarmanninum Roger Waters eftir að hann klæddist nasistabúningi á tónleikum þar í borg. Waters gagnrýnir rannsókn lögreglunnar og segir hana pólitíska. Í Þýskalandi er ólöglegt að bera nasistamerki eins og hakakrossa og merki SS-sveitarinnar, undantekningar eru leyfðar sé slíkt gert í fræðilegum eða listrænum tilgangi.
Waters, sem er einn af stofnendum hljómsveitarinnar Pink Floyd, kom fram á tónleikum í Mercedes Benz-höllinni fyrr í mánuðinum. Brá hann sér í líki persónunnar Pink úr rokkóperunni The Wall, íklæddur svörtum leðurjakka og bar hann rautt armband með tveimur hömrum í kross, sem minnir um mjög á hakakross. Auk þess tók Waters sér gerviriffil í hönd og skaut að áhorfendum.
Talsmaður lögreglunnar í Berlín segir að túlka megi klæðaburð Waters þannig að hann sé að vegsama eða réttlæta ógnarstjórn og ofbeldi nasista og raski það almannafriði.
Waters sendi frá sér yfirlýsingu á Facebook þar sem hann segir að honum þyki miður að sviðsframkoma hans hafi leitt til ófrægingarherferða og þöggunar í hans garð. Hann segir að framkoma hans hafi verið til fordæmingar fasisma og hann hafi brugðið sér í gervi fasísks foringja á sviði frá árinu 1980. Á sviðinu birti hann einnig nöfn gyðinga sem myrtir voru í helför nasista, þar á meðal nafn Önnu Frank.
Good morning to every one but Roger Waters who spent the evening in Berlin (Yes Berlin) desecrating the memory of Anne Frank and the 6 million Jews murdered in the Holocaust. pic.twitter.com/4tcrV6f8mt
— Israel ישראל 🇮🇱 (@Israel) May 24, 2023
Þetta er ekki í fyrsta sinn sem Waters klæðist slíkum búningi á sviði. Í atriði í kvikmyndinni The Wall, sem byggir á samnefndri plötu Pink Floyd, ímyndar persónan Pink sér að hún sé einræðisherra á fasistasamkomu.