Vladimir Solovyov, sem stýrir vinsælum umræðuþætti í sjónvarpi, hefur síðustu kvöld flutt Rússum útgáfu Kreml af heimsfréttunum, eins og hann gerir í hverri viku. Fyrr í vikunni sagði hann áhorfendum að nú væri hann með góða frétt. „Hver bandaríski bankinn á fætur öðrum neyðist til að loka,“ sagði hann og bætti við að þrír hafi farið á hausinn á síðustu dögum. En hann lét ekki þar við sitja og sagði að samkvæmt mati sérfræðinga væru að minnsta kosti tíu í viðbót á hættusvæði.
Fréttin um hrun Silicon Valley Bank er sem sagt notuð til að segja Rússum að Vesturlönd standi á brún fjármálakreppu.
Enskumælandi sjónvarpsstöðin RT sagði til dæmis að „hin bandaríska bankakreppa geti leitt til hruns vestræna fjármálakerfisins, og Pravda skrifaði að „hrunið grafi undan bandaríska bankakerfinu á heimsvísu“.
Tsargrad, sem er öfgaþjóðernissinnaður miðill, sagði landsmönnum hversu heppnir þeir séu að landið sé nánast sambandslaust við alþjóðlega fjármálakerfið vegna stríðsins í Úkraínu. Muni hrunið því aðeins hafa óbein áhrif á Rússland.
