Þann 30. mars næstkomandi verður þingfest í Héraðsdómi Vesturlands mál gegn manni sem sakaður er um brot gegn kynferðislegri friðhelgi.
Í nafnhreinsaðri ákæru málsins segir að brotin hafi verið framin fimmtudaginn 14. júlí árið 2022 í samskiptum við konu í gegnum Snapchat-samskiptaforritið. Er maðurinn sagður hafa sent konunni nektarmynd af henni sjálfri án samþykkis hennar. Hann hafi síðan hótað að dreifa fleiri nektarmyndum af henni og er hótunin sögð hafa verið til þess fallin að vekja konunni hræðslu og kvíða.
Brotin varða 1. og 2. málsgreinar 199. greinar a almennra hegningarlaga, en þær eru svohljóðandi:
„Hver sem útbýr, aflar sér eða öðrum, dreifir eða birtir myndefni, texta eða sambærilegt efni, þ.m.t. falsað efni, af nekt eða kynferðislegri háttsemi annars manns án hans samþykkis skal sæta sektum eða fangelsi allt að 4 árum.
Sömu refsingu skal sá sæta sem hótar því sem greinir í 1. mgr., enda sé hótunin til þess fallin að vekja hræðslu eða kvíða hjá þeim sem hún beinist að.“
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar. Konan krefst miskabóta að fjárhæð ein milljón króna.