Ísraelsher hefur hafist handa við að dæla sjó úr Miðjarðarhafinu inn í umfangsmikið net neðanjarðaganga Hamas-samtakanna á Gaza. Undirbúningur að aðgerðinni hefur staðið yfir um skeið en Ísraelsher hefur sett upp fimm öflugur dælur nærri Al-Shati flóttamannabúðunum í norðurhluta Gaza-strandarinnar. Dælurnar eru sagðar geta dælt þúsundum rúmmetra af sjó á klukkustund og þannig gæti Ísraelsher farið langt með að fylla gangnakerfið á nokkrum vikum.

Hamasliðar hafa haldið því fram að gangnakerfið sé um 500 kílómetra langt. Þá tölu er ómögulegt að staðfest en hvort sem hún er rétt eða ekki þá er ljóst að kerfið er gríðarlega umfangsmikið og gerir Ísraelsher erfitt um vik í stríði sínu við Hamas. Þá er gangnakerfið þakið gildrum og því ljóst að hefðbundnari hernaðaraðgerðir gætu orðið mannskæðar.

Hamas-liðar nota gangnakerfið til þess að geta ferðast huldu höfði um Gazaströndina og flytja vopn og vistir. Talið er að margir gíslar þeir gíslar sem enn eru í haldi Hamas-samtakanna séu látnir dúsa einhversstaðar í gangnakerfinu.

Aðgerðin hefst á sama tíma og talsverðar vendingar virðast vera að eiga sér stað í afstöðu Bandaríkjamanna til hernaðaraðgerða Ísraelsmanna. Joe Biden, Bandaríkjaforseti, lét hafa eftir sér í gær að þolinmæði bandamanna Ísraels færi þverrandi gagnvart linnulausum árásum á Gazaströndina og að breyta þyrfti um kúrs.

Yfirgnæfandi meirihluti allsherjarþings Sameinuðu þjóðina kaus í gærkvöldi með ályktun um tafarlaust vopnahlé í mannúðarskyni í átökum á Gazasvæðinu sem og lausn allra gísla án skilyrða. 153 ríki greiddu tillögunni atkvæði, en 10 voru á móti og 23 sátu hjá. Segja má að ályktunin sé andsvar við þeirri ákvörðun Bandaríkjanna að beita neitunarvaldi sínu í Öryggisráði Sameinuðu þjóðanna í fyrr í vikunni gegn tillögu um vopnahlé á Gaza sem vakti talsverða hneykslan.