Arndís Anna Kristínardóttir Gunnarsdóttir, þingmaður Pírata, var ofurölvi inni á salerni skemmtistaðarins Kíkí á aðfaranótt laugardags og svaf áfengisdauða. Þetta kemur fram í frétt Nútímans sem byggir á heimildarmönnum innan lögreglunnar.

„Þegar dyraverðir skemmtistaðarins fóru að kanna hvers vegna salernið hafði verið læst í svo langan tíma, þar sem vísa átti gestum út vegna lokunar, komu þeir að þingmanninum og vöktu hann. Arndísi Önnu hefur greinilega brugðið við þetta, eins og hún greinir frá sjálf, og brást hún því hin versta við og þess vegna var kallað eftir aðstoð lögreglu,“ segir í fréttinni.

Nútíminn bendir á að atvikið hafi komið fyrir í dagbók lögreglunnar á laugardagsmorgun en þar segir: „Dyraverðir á skemmtistað í miðbænum óska eftir aðstoð lögreglu við að fjarlægja ofurölvi aðila af staðnum.“ Ljóst er að atvikið átti sér stað skömmu eftir lokun staðarins en þá var Arndís Anna áfengisdauð inni á salerninu.

Í yfirlýsingu sem Arndís Anna birti um helgina segir hún að framganga dyravarða á Kíkí hafi verið óþarflega harkaleg og niðurlægjandi:

„Ég brá mér á skemmtistað á föstudagskvöld, eins og gengur og gerist, og fór á einn minn uppáhaldsstað, Kiki. Ég fór á salernið og var búin að vera þar sjálfsagt í talsverðan tíma þegar dyraverðir opna hurðina. Mér brá við þetta og við að það stæði til að bera mig út með valdi, þegar mér fannst ekki tilefni til. Ég hef skilning á því að starf dyravarða á skemmtistöðum sé erfitt og ekki síst með fullt hús af fólki í misjöfnu ástandi, þó mín upplifun hafi verið sú að þarna hafi framganga þeirra verið óþarflega harkaleg og niðurlægjandi. Ég hef talað við fyrirsvarsmann staðarins sem bað mig afsökunar fyrir þeirra hönd, sem mér þykir afar vænt um.

Ég er enn fremur þakklát lögreglunni fyrir þeirra viðbrögð og fagmennsku, og fyrir alúðina sem þau sýndu mér í kjölfarið, enda komst ég í talsvert uppnám við þessar aðfarir. Það að lögreglan taki útkall frá hinsegin skemmtistað alvarlega, hvers eðlis sem það er, og bregðist svona skjótt við er sérstaklega mikilvægt og yljaði það mér um hjartaræturnar í öllum þessum ósköpum.“