Mbl.is greindi frá því fyrir stuttu að Grímur Grímsson yfirlögregluþjónn hjá lögreglunni á höfuðborgarsvæðinu hafi staðfest að þrír menn hafi verið handteknir vegna skotárásarinnar sem framin í Úlfarsárdal í nótt. Grímur tjáði Mbl að atburðarásin væri að skýrast en rannsóknin sé enn í fullum gangi. Hann segir ekki ákveðið hvort lýst verður eftir einhverjum vegna málsins en segir að lögreglan sé enn að hafa upp á fólki í tenglsum við málið.
Maður varð fyrir skoti en lifði árásina af en Grímur tjáði Mbl að hann hefði verið útskrifaður af sjúkrahúsi. Annað skot lenti á íbúð fólks sem tengdist málinu ekki á nokkurn hátt. Sá aðili sem skaut náði að flýja af vettvangi en virðist nú hafa verið handtekinn eftir leit lögreglu í dag. Sagði lögreglan að um uppgjör milli tveggja hópa hefði verið að ræða.
DV ræddi fyrr í dag við konu sem býr í fjölbýlishúsinu sem skotárásin var framin í námunda við. Hún sagði íbúa slegna óhug og að ekki hefðu allir þeirra verið meðvitaðir um hvað hefði átt sér stað þegar börn í húsinu og næsta nágrenni héldu til skóla í morgun örfáum klukkutímum eftir að árásin átti sér stað. Hún gagnrýndi að ekki hefði allir íbúar verið strax látnir vita en eins og sjá mátti af myndum úr anddyri hússins var þar enn blóð úr hinum særða þegar íbúar fóru á stjá í morgun.
