Eins og DV greindi frá fyrir tæplega hálfum mánuði hafnaði umhverfis- og skipulagsráð Reykjanesbæjar áformum eiganda einbýlishúss sem selt var undan öryrkja á afar umdeildu nauðungaruppboði um að breyta því í gistiheimili. Nú hefur bæjarráð Reykjanesbæjar einnig hafnað þessum áformum. Það er þó Sýslumaðurinn á Suðurnesjum sem veitir endanlegt leyfi til reksturs gististaða í bænum.
Eins og mörgum er líklega í fersku minni var húsið, sem stendur við Hátún 1 í Reykjanesbæ, áður í eigu ungs manns sem varð öyrki eftir læknamistök. Hann keypti húsið fyrir bætur sem hann fékk eftir að hafa orðið fyrir læknamistökunum. Ungi maðurinn greiddi ekki ýmis lögboðin gjöld af húsinu eins og t.d. fasteigna- og fráveitugjöld og húsið endaði á nauðungaruppboði.
Ungi maðurinn bar fyrir sig vankunnáttu en skuld upp á 2,5 milljónir króna hafði safnast upp. Sýslumaðurinn á Suðurnesjum seldi húsið á nauðungaruppboðinu fyrir 3 milljónir króna en markaðsvirði þess er tæplega 60 milljónir króna. Salan vakti reiði margra og bent var meðal annars á að vegna fötlunar sinnar hefði ungi maðurinn þurft að njóta meiri aðstoðar og leiðbeininga en ella þegar í slíkt óefni var komið.
Fram hefur komið í fréttum fjölmiðla að kaupandinn var útgerðarmaður í Sandgerði. Bæjaryfirvöld í Reykjanesbæ reyndu að fá hann til að falla frá kaupunum svo að ungi maðurinn og fjölskylda hans gætu búið áfram í húsinu. Hann varð hins vegar ekki við því og ungi maðurinn og hans fjölskylda þurftu á endanum að flytja í félagslegt húsnæði.
Núverandi eigandi hússins hefur sótt um að fá að reka gistiheimili fyrir að hámarki 10 gesti í húsinu. Eins og DV greindi frá var umsókninni vísað, af Sýslumanninum á Suðurnesjum, til umsagnar umhverfis- og skipulagsráðs Reykjanesbæjar sem veitti ekki heimild til reksturs gistiheimilis í húsinu með vísan til þess að ekki væri sýnt fram á tilskilin bílastæði á lóð samkvæmt reglum um gistiheimili á íbúðasvæðum í Reykjanesbæ.
Bæjarráð Reykjanesbæjar hefur nú einnig tekið umsóknina til umsagnar en það fundaði fyrr í dag eins og það gerir alla fimmtudaga. Í fundargerðinni kemur fram að meðal mála sem tekin voru fyrir á fundinum var erindi Sýslumannsins á Suðurnesjum vegna umsóknar um leyfi til reksturs minna gistiheimilis að Hátúni 1.
Samkvæmt fundargerðinni voru með erindinu lagðar fram umsagnir byggingarfulltrúa Reykjanesbæjar og Heilbrigðiseftirlits Suðurnesja.
Niðurstaða bæjarráðs var sú að hafna umsókninni með vísan til fyrirliggjandi umsagna.
Gögn málsins eru ekki birt með fundargerðinni á vef Reykjanesbæjar. Það er því ekki hægt að fullyrða algjörlega að byggingarfulltrúinn og Heilbrigðiseftirlitið hafi veitt neikvæðar umsagnir en miðað við þá niðurstöðu sem gefin er upp í fundargerð bæjarráðs liggur beinast við að álykta að umsagnir þessara aðila hafi verið neikvæðar.
Eins og áður segir er það Sýslumaðurinn á Suðurnesjum sem samþykkir eða synjar um leyfi til reksturs gististaða í Reykjanesbæ. Á lista, á vef sýslumannsembætta landsins, um skilyrði sem þarf að uppfylla til að fá leyfi til reksturs gististaðar kemur ekki fram að meðal þeirra séu jákvæðar umsagnir frá heilbrigðiseftirliti og bæjaryfirvöldum. Það er því ekki ljóst á þessari stundu hvort þessar neikvæðu umsagnir leiði til þess að Sýslumaðurinn á Suðurnesjum muni ekki heimila rekstur gistiheimilis í húsinu.
Í fundargerðinni kemur fram að fyrirtækið Sæstjarnan ehf., sem er í eigu útgerðarmannsins sem keypti húsið, hafi lagt umsóknina fram. Maðurinn á félagið þó ásamt syni sínum. Sæstjarnan ehf. er þó reyndar ekki skráð með lögheimili í Sandgerði heldur á Tálknafirði. Sæstjarnan er útgerðarfélag en samkvæmt vefnum 200mílur, sem er hluti af mbl.is, gerir félagið út 2 skip en samkvæmt vef Fiskistofu er í báðum tilfellum um smábáta að ræða.
