Talið er að stríðsherrann Yevgeny Prigozhin, stofnandi Wagner-málaliðahersveitarinnar, hafi látið lífið þegar lítil flugvél var skotin niður í grennd við Moskvu í gær. Tíðindin hafa vakið heimsathygli enda hefur Prigozhin verið í aðalhlutverki ótrúlegri valdabaráttu rússnesku elítunnar undanfarin misseri.
Eins einkennilega og það kann að hljóma kemur hið meinta dauðsfall fáum á óvart enda sveik Prigozhin Vladimir Pútín, Rússlandsforseta, eftirminnilega í sumar þegar hann tilkynnti um uppreisn herdeildarinnar en markmiðið var að hefna sín á yfirmönnunum rússneska hersins. Helstu óvinir Pútíns í Rússlandi kemba yfirleitt ekki hærurnar og þrátt fyrir að Prigozhin hafi upphaflega verið heitið griðum þá bjuggust flestir við því að hann yrði tekinn úr umferð fyrr en seinna.
Þannig tjáði Joe Biden Bandaríkjaforseti sig um málið og sagði í stuttu máli að fregnirnar af flugslysinu kæmu sér ekki á óvart.
Talið er að tíu einstaklingar hafi verið um borð í vélinni, sjö einstaklingar og þrír áhafnarmeðlimir. Þar á meðal náinn samstarfsmaður Prigozhin innan Wagnerherdeildarinnar, Dmitry Utkin, þekktum hrotta sem dáði meðal annars Adolf Hitler.
Það er þó morgunljóst að enn eiga mörg kurl eftir að koma til grafar í málinu. Í umfjöllun erlendra miðla hefur verið bent á að Prigozhin hafi gert ýmsar varúðarráðstafanir til að auka öryggi sitt, til dæmis þær að fjölmargir einstaklingar hafa breytt nafni sínu í Yevgeny Prigozhin. Það að nafnið þekkta hafi verið á farþegalista vélarinnar sé því ekki staðfesting á því að hinn eini og sanni hafi verið um borð.
Þá er uppi þær kenningar að Prigozhin hafi hreinlega sviðsett dauða sinn. Önnur flugvél með tengsl við Wagner-hópinn var á flugi skammt frá þegar hinni flugvélinni var grandað. Það væri ekki í fyrsta sinn sem Prigozhin yrði heimtur úr helju. Samkvæmt Daily Mail var hann um tíma talinn af eftir átök Wagnerhópsins í Afríku árið 2019 en skaut síðar upp kollinum, sprelllifandi, í aðdraganda innrásarinnar í Úkraínu.
Enn er deilt um hvað hafi grandað flugvélinni. Líklegast er talið að hún hafi verið skotin niður af rússneskum loftvörnum en þá eru einnig hávær orðrómur um að vínkassa um borð hafi verið dulbúin sprengja sem hafi grandað vélinni.
Fregnirnar af flugslysinu hafa vakið mikla reiði meðal þeirra sem tengjast Wagner-hópnum. Fjölmargir gerðu sér ferð að höfuðstöðvum Wagner-hópsins í St. Pétursborg, heimaborg Prigozhin, og lögðu blóm og kerti að byggingunni. Þá loga Telegram-rásir sem tengjast Wagnerhópnum og þar eru uppi hávær köll um hefndaraðgerðir og hreinlega aðra uppreisn gagnvart rússneskum yfirvöldum.
Ekkert hefur heyrst frá yfirvöldum í Kreml eftir tíðindin í gær en erlendir miðlar greina frá því að Vladimir Pútín hafi skellt sér á tónaleika í gær.
