Helga Vala Helgadóttir, þingmaður Samfylkingarinnar, minnir í færslu á Facebook-síðu sinni á að 1. júní síðastliðinn hafi tekið gildi mikilvægar breytingar á skaðabótalögum.

Samkvæmt breytingunni eiga þau sem höfða mál til greiðslu miska- eða skaðabóta, vegna háttsemi sem hefur verið til rannsóknar lögreglu og varðar við viss ákvæði hegningarlaga, skuli hljóta gjafsókn á öllum dómstigum ef málstaður viðkomandi er talinn gefa nægilegt tilefni til þess. Gjafsóknarnefnd taki þá ákvörðun um hvort viðkomandi hljóti gjafsókn í samræmi við þetta ákvæði.

Það var Helga Vala sem átti frumkvæðið að þessari breytingu og hún segir í færslunni að þessi breyting sé sérstaklega mikilvæg fyrir þolendur heimilis- og kynferðisofbeldis og möguleika þeirra til að sækja skaðabætur í einkamálum gegn gerendum:

„Nú vitum við að sönnunarkrafan í sakamálum er mjög rík, mun meiri en í einkamálum. Fjöldinn sem kærir er brot af tilvikum, lögregla fellir niður fjölda mála sem og ákærendur. Allt gerist þetta þrátt fyrir fjölda gagna sem færa sönnur á mál þeirra. Með lögfestingu á þessu litla þingmáli mínu tók Alþingi ákvörðun um að brotaþolar fengju lögbundna gjafsókn í þessum málum, líkt og gert er í öðrum mikilvægum málum eins og faðernis, lögræðis og barnaverndarmálum svo dæmi séu tekin.

Þannig þarf þolandi ekki að vera með tekjur undir því viðmiði sem gjafsóknarnefnd hefur, sem eru langt undir meðallaunum í landinu, heldur er viðurkenndur ríkur sanngirnisréttur til handa brotaþolum í þessum mjög svo flóknu málum. Lögin hafa tekið gildi.“