Í síðustu viku var þingfest fyrir Héraðsdómi Reykjavíkur mál sem Héraðssaksóknari hefur höfðað á hendur 33 ára gömlum karlmanni fyrir ofbeldi gegn lögreglumönnum. Um er að ræða atvik sem áttu sér stað, að virðist, á heimili mannsins, við Miklubraut, þann 21. september 2022.
Samkvæmt ákæru urðu tveir lögreglumenn fyrir ofbeldi mannsins. Segir að hann hafi gripið um höfuð annars þeirra og þrýst fingrum inn í vinstra auga hans með þeim afleiðingum að lögreglumaðurinn hlaut hrufl og meiðsli í vinstri auga.
Hann er síðan sagður hafa gripið um andlit annars lögreglumanns, klipið um hægri kinn og ýtt honum utan í ísskáp, með þeim afleiðingum að lögreglumaðurinn hlaut roða og bólgu á hægri kinn og mar á hægri upphandlegg.
Brotið telst varða við 106. grein almennra hegningarlaga en þar segir í fyrstu grein:
„Hver, sem ræðst með ofbeldi eða hótunum um ofbeldi á opinberan starfsmann, þegar hann er að gegna skyldustarfi sínu eða út af því, og eins hver sá, sem á sama hátt leitast við að hindra framkvæmd slíks starfa eða neyða starfsmanninn til þess að framkvæma einhverja athöfn í embætti sínu eða sýslan, skal sæta … 1) fangelsi allt að 6 árum. [Ef brot samkvæmt þessari málsgrein beinist að opinberum starfsmanni, sem að lögum hefur heimild til líkamlegrar valdbeitingar, má beita fangelsi allt að 8 árum.] 2) [Beita má sektum, ef brot er smáfellt.] “
Héraðssaksóknari krefst þess að hinn ákærði verði dæmdur til refsingar og greiðslu alls sakarkostnaðar.
