„Síðastliðinn fimmtudag átti sér stað hræðilegt atvik í Hafnarfirði. Ungur pólskur maður var stunginn til bana á bílastæði fyrir utan Fjarðarkaup. Meintir gerendur eru fjórir Íslenskir strákar á framhaldsskólaaldri, sem gerir þetta kannski enn sorglegra. Þetta atvik er mikill harmleikur og hefur tekið mjög á pólskt samfélag hér á landi. Þetta vekur upp hjá öllum margar spurningar og vangaveltur. Af hverju gerðist þetta? Hvað leiddi til þess? Var hægt að koma í veg fyrir þessa hörmung?“ skrifar Martina Ylfa í aðsendri grein.
„Það eru jafn margar skoðanir á þessu og spurningar. En að mínu mati, sem pólsk kona sem hefur búið hér á landi síðan ég var á grunnskólaaldri hef ég mitt eigið álit.
Pólverjar á Íslandi er einn stærsti hópur innflytjenda á Íslandi. Samkvæmt Hagstofu Íslands eru 20% af öllu fólki á íslenskum vinnumarkaði pólskir ríkisborgarar. Ísland ekki fjölmennasta ríki í heimi, en til þess að þróa áfram okkar hagkerfi þurfum við að fá vinnuafl að utan. Pólverjar sem koma hér koma til Íslands einmitt til þess að starfa, en við þurfum að muna að þetta fólk á líka fjölskyldur, börn og vini. Talsvert af innflytjendum ákveða að vera áfram hér á landi og kalla Ísland sitt land.
En á móti, þó margir séu opnir og jákvæðir í garð innflytjenda, sýna atvik eins og harmleikur síðasta fimmtudags fram á að við eigum enn langan veg framundan. Fordómar og misskilningar eru því miður út um allt. Það sem mér finnst enn sorglegra er það að okkar yngri kynslóð er líka með slíkt viðhorf. Þetta sýnir það að við þurfum að bæta okkur. Fordómar byrja oft smáir, með gríni og athugasemdum. Ég hef oft heyrt að ef útlendingar myndu læra Íslensku þá væri þetta í lagi og þeir yrðu boðnir velkomnir með opnum örmum, en það er ekki svo einfalt. Ég tala íslensku og hef starfað sem túlkur í fjölmörg ár, en samt fæ ég oft athugasemdir um hreiminn minn og spurningar hvaðan ég er. Ég ólst upp á Íslandi, og lít á mig sem Íslending. Íslendingur af pólskum uppruna, en samt, Íslendingur. Ég veit að þetta er ekki endilega illa meint, en ef ég á að vera hreinskilin þá fæ ég sting í hjartað þegar ég fæ svona athugasemdir. Ég hugsa með mér: „Af hverju get ég ekki verið venjuleg?“ Mér líður ekki eins og ég sé öðruvísi, en aðrir virðast vera að hugsa það.
Þó svona athugasemdir eru oftast saklausar, þá þurfum við að muna að við höfum áhrif. Fyrir ungt fólk, sem hefur ekki náð andlegum þroska, er oft einfalt að komast að þeirri niðurstöðu að „öðruvísi“ er það sama og „verri.“ Að þetta er barátta. „Við“ gegn „þeim.“
Svona hugsunarháttur getur dregið með sér hræðilegar afleiðingar. Ég neita því ekki að sumt fólk af erlendum uppruna hefur líka gert eitthvað af sér, en það eru undantekningar, ekki regla.
Við þurfum öll að gera betur og hugsa um hvernig við komum fram við fólk í kringum okkur. Á stundum eins og þessum er mikilvægt að muna að við erum öll partur af íslensku samfélagi, hvaðan sem við komum. Við þurfum öll að vinna í gagnkvæmum skilningi og umburðarlyndi.
Takk fyrir Martyna Ylfa“
Martyna Ylfa Suszko hefur búið á Íslandi síðan 2005 og er af pólskum uppruna. Hún starfar sem túlkur og rekur túlkunarfyrirtæki ásamt vinkonu sinni Aleksöndru. Hún hefur klárað BA nám í ensku og japönsku við Háskóla Íslands og er nú í MA námi í þjóðfræði. Martyna er mikill dýravinur og á hund, kött, hest og tvær körtur.
Sjá einnig: Minningarathöfn um pólska manninn sem var myrtur – „Pólverjar eru Íslendingar“
