Einkahlutafélagið Harpia ehf. var úrskurðað gjaldþrota þann 16. febrúar síðastliðinn. Samkvæmt fyrirtækjaskrá Skattsins er eigandi félagsins Atli Guðjón Helgason, lögfræðingur.

Félagið var stofnað árið 2016 en starfsemi þess  var leiga atvinnuhúsnæðis, bygging íbúðar- og atvinnuhúsnæðis, pípulagnir og uppsetning hitunar- og loftræstikerfa.

Samkvæmt heimildum DV mun rekstur félagsins hafa tengst þjónustu Atla við einn skjólstæðinga hans, sem er iðnaðarmaður. Atli, sem er lögfræðingur að mennt, hefur þó ekki endurheimt lögmannsréttindi sín en hefur sinnt verkefnum tengdum lögmennsku.

Atli var árið 2001 dæmdur í 16 ára fangelsi fyrir að hafa orðið viðskiptafélaga sínum, Einari Erni Birgissyni, að bana í Öskjuhlíð þann 8. nóvember árið 2000. Hann hlaut uppreist æru árið 2016 sem þýðir að hann hefur óflekkað mannorð í skilningi laganna.

Árið 2018 úrskurðaði Héraðsdómur Reykjavíkur að Atli skyldi fá lögmannsréttindi sín að nýju. Landsréttur sneri þeirri ákvörðun við sama ár. Atli kærði þá ákvörðun til Mannréttindadómstóls Evrópu á grundvelli vanhæfis Landsréttardómara og var hans kæra hluti af hinu svokallaða Landsréttarmáli. Ríkið gerði sátt við Atla vegna málsins í fyrra.

Skiptastjóri Harpia veitir ekki upplýsingar um gjaldþrot félagsins þar sem svo skammt er liðið frá því. DV hafði samband við Atla sem vill ekki tjá sig um málið.