Allt tiltækt lið slökkviliðs höfuðborgarsvæðisins hefur verið kallað út vegna eldssvoða nærri Sundahöfn. Minnst tveir sjúkrabílar hafa verið kallaðir út. Fimm hafa verið fluttir á slysadeild.
Um er að ræða húsnæði að Vatnagörðum 18.
Eldurinn er í áfangaheimili en Fréttablaðið hefur samkvæmt upplýsingum frá íbúa heimilisins að eldurinn hafi kviknað í einu herbergi. Enn er óstaðfest hvort einhver sé inni í herberginu. Samkvæmt íbúanum sem vildi ekki láta nafns síns getið er það þó talið ólíklegt.
Hann sagði enn einn inni í húsnæðinu en á vettvangi er allt tiltækt lið slökkviliðsins.
Áfangaheimilið Betra líf er starfrækt í húsnæðinu. Í viðtali við Heimildina í lok janúar sagði Arnar Gunnar Hjálmtýsson, forstöðumaður áfangaheimilisins, leigja þar virkum fíklum og umsækjendum um alþjóðlega vernd.
„Já, ég er að leigja virkum fíklum og umsækjendum um alþjóðlega vernd,“ segir Arnar. Aðspurður hvernig það fari saman að leigja þessum ólíku hópum herbergi í sama húsnæði segir hann að það sé hægt að loka af svæði í húsnæðinu og skipta því upp í þrjár einingar. Alls leigðu sex flóttamenn herbergi á áfangaheimilinu þegar viðtalið var tekið. „Þetta er ófremdarástand fyrir þennan hóp af fólki,“ segir Arnar.
Arnar svaraði síma þegar blaðamaður DV hringdi í hann klukkan rúmlega 10: „Ég er aðeins upptekinn. Má ég heyra í þér síðar. Bless.“ Skellti Arnar síðan á blaðamann.
Samkvæmt frétt RÚV eru 23 búsettir á áfangaheimilinu en viðvera þeirra er slitrótt.
Strætisvagni hefur verið lagt á vettvangi þar sem íbúar fá skjól, þeim mun einnig verða veitt áfallahjálp.
Fréttin verður uppfærð.
