Áður hafði spurst út að Úkraínumenn myndu fá Bradley og Stryker ökutæki en báðar tegundirnar gera úkraínskum hermönnum kleift að ferðast um við víglínurnar á mun öruggari hátt en áður.
Bradley ökutækin eru búin flugskeytum sem eru sérhönnuð til árása á skriðdreka. Stryker ökutækin eru aðallega notuð við liðsflutninga.
Einnig fá Úkraínumenn meðal annars átta Avenger loftvarnarkerfi, nætursjónauka og gríðarlegt magn skotfæra.
Pentagon segir að með þessum pakka sé framlag Bandaríkjanna til Úkraínumanna frá upphafi stríðsins orðið 27,4 milljarðar dollara. Það er álíka mikið og verg þjóðarframleiðsla Íslands á síðasta ári.
