Þetta sagði Flemming Splidsboel, Rússlandssérfræðingur hjá Dansk Institut for International Studier, í samtali við Jótlandspóstinn.
Aðfaranótt þriðjudags náðu leiðtogar ESB-ríkjanna samkomulagi um að banna innflutning á um 90% af því magni af olíu sem Rússar selja ESB-ríkjunum.
Splidsboel sagði að ef fólk telji að þetta muni breyta gangi stríðsins þá verði það að búa sig undir vonbrigði. „Þessi nýi refsiaðgerðapakki mun ekki verða til þess að Pútín breyti stefnu sinni í náinni framtíð. Það getur vel verið að Rússar mótmæli á götum úti í haust vegna verðhækkana. En hver veit hvort það breyti nokkru? Þess utan er töluverður tími þangað til,“ sagði hann.
Hann sagði að Pútín muni væntanlega verða ósáttur við þennan refsiaðgerðapakka. Nú þurfi Rússar að finna nýja kaupendur að olíu og gasi og það geti orðið erfitt. Á móti hækki orkuverð og það komi Rússum til góða og þar með stríðsrekstri þeirra. Tæpur helmingur af útflutningstekjum Rússa fæst með sölu á olíu og gasi.