DV hefur borist myndband af einstaklingi sem hendir bensínsprengju að glugga í fjölbýlishúsi í Reykjavík en myndbandið hefur verið í dreifingu á samfélagsmiðlum. Samkvæmt heimildum DV átti árásin sér stað fyrir nokkrum dögum og beindist að fjölbýlishúsi í Árbæ þar sem að John Petur Vágseið, einn af aðilunum sem er í haldi lögreglu vegna hnífaárásarinnar í Bankastræti Club í síðustu viku. er búsettur ásamt fjölskyldu sinni.
Greint hefur verið frá því að undanfarna daga hafi hótanir, árásir og skemmdarverk átt sér stað sem viðbrögð við árásinni og beinst gegn fjölskyldum þeirra sem talið er að hafa staðið á bak við hana.
Þá var Slökkviliðið á höfuðborgarsvæðinu kallað út tvisvar eftir miðnætti í nótt. Annars vegar vegna eldsprengju sem var kastað á einbýlishús í Hafnarfirði og hins vegar reyksprengju sem var kastað inn um rúðu á einbýlishúsi Fossvogi. Morgunblaðið greinir frá.
Margeir Sveinsson aðstoðaryfirlögregluþjónn staðfesti í samtali við Fréttablaðið að bæði málin tengist hnífsárásinni sem átti sér stað á Bankastræti Club á fimmtudaginn í síðustu viku. Íbúar beggja húsa voru heima þegar sprengjunum var varpað en engan sakaði.
Sjá einnig: Sprengjurnar sem kastað var á hús í nótt tengdust Bankastræti Club-árásinni
Margeir segir að lögreglan hafi náð þokkalega utan um árásina sjálfa þó að tveggja eða þriggja aðila sé enn leitað. Lögreglan hafi óttast að árásin hefði afleiðingar á borð við þær sem áttu sér stað í nótt. Enginn hafi verið handtekinn vegna atvikanna í nótt en lögregla leiti þeirra sem stóðu að þessu.