Athafnakonan Margrét Friðriksdóttir er loksins smituð af Covid-19. Þessu greinir hún frá í færslu á frettin.is. Eins og DV hefur greint frá barst Covid-smit inn á heimili Margrétar og hefur hún reynt sitt besta að smitast af veirunni. Hún er óbólusett og telur farsælast að fá náttúrulegt mótefni við veirunni.
„Covid hefur nú yfirtekið heimilið og ég náði loks að smitast en það hefur komið skýrt fram hjá mér að ég vildi fá náttúrulega mótefnið sem er best og nú er ónæmiskerfið að vinna á veikindunum. Þetta tók sinn tíma og var ég eiginlega búin að gefast upp á því að reyna smitast og farin að sætta mig við að ég myndi sennilega ekki ná því. Ég gat varla verið útsettari fyrir veirunni hér á heimilinu með tvo Covid smitaða, en það tókst að lokum,“ skrifar Margrét sigri hrósandi.
Það vakti talsvert umtal þegar Margrét greindi frá því að hún gæfi dætrum sínum ormalyfið Ivermectin við sjúkdómnum en hún hefur lesið sig til á netinu um lyfið og telur það hafa gagnast í baráttunni við Covid-19. Þess má geta að framleiðandi lyfsins, Merck, hefur lýst því yfir að engar vísindalegar sannanir séu fyrir þeirri vissu Margrétar.
„Ég er svo lánsöm að eiga lyfið Ivermektín og öll þau vítamín sem mælt er með af sérfræðingum erlendis hvað varðar snemmbúna meðferð við Covid. Ég tók ráðlagðan skammt af meðferðinni og náði að sofna. Þegar ég vaknaði um morguninn fann ég fyrir hálsbólgu og höfuðverk og ákvað því að fara í sýnatöku,“ skrifar Margrét
Jákvæð niðurstaða barst svo Margréti í gærkvöldi. Hún segir að heilsan sé nokkuð góð og þakkar það ormalyfinu. Kuldahrollurinn sé farinn og höfuðverkurinn líka en hún finni fyrir smávegis þyngslum í lungum en sé ekki með hósta.
„Það sem ég verð að segja og finnst verulega sorglegt er að ekki séu notaðar neinar snemmbúnar Covid meðferðir hér á landi. Fólk sem greinist með Covid er bara sent heim í einangrun, ekki með nein lyf sem draga úr alvarlegum veikindum, en ef alvarleg veikindi verða af Covid þá er mun líklegra að sjúkdómurinn valdi skemmdum og alvarlegum eftirköstum,“ skrifar Margrét.
Hún segist síðan hafa verið að útvega veikum einstaklingum Ivermectin undanfarið og sé sannfærð um undraverða virkni lyfsins. Boðar hún viðtöl við einstaklinga sem hafi náð sér af Covid-19 með hjálp lyfsins.
