Á þriðjudaginn fór Vladímír Pútín, Rússlandsforseti, til Íran þar sem hann ræddi við þarlenda ráðamenn og Recep Tayyip Erdogan, forseta Tyrklands. Ýmis mál voru rædd og Rússar og Íranar styrktu samband sitt en bæði ríkin eiga það sameiginlegt að vera andstæðingar Bandaríkjanna.

En það gæti meira hafi búið að baki ferðinni en bara að ræða stjórnmál og viðskipti við Írana. Það er að minnsta kosti mat Abbas Gallyamov, fyrrum ræðuritara Pútíns, sem nú býr erlendis. Hann segir að miðað við hvernig ferðina bar að megi ráða að Pútín hafi hugsanlega rætt við íranska ráðamenn um að hann fái hæli þar ásamt fjölskyldu sinni og nánustu bandamönnum ef hann neyðist til að flýja land vegna óróa og uppreisnar.

Mirror skýrir frá þessu og hefur eftir Gallyamo að þegar lesið sé í ferð Pútíns til Íran sé rétt að hafa í huga að Íran sé langbesta landið fyrir hann til að flýja til ef aðstæður í Rússlandi neyða hann til að flýja land. Hann sagði að Pútín væri mjög varkár maður og hugsi út í alla möguleika. „Íran á alla möguleika á að verða það fyrir rússnesku elítuna sem Argentína var fyrir nasista,“ sagði hann.

„Það er rétt að írönsku klerkarnir gætu krafist þess að Pútín og félagar hans snúist til íslamskrar trúar en er það vandamál fyrir sanna rússneska föðurlandsvini? Eftir allt þá er aðalatriði í þeirra huga ekki lýðræði og heldur ekki mannréttindi,“ sagði hann.