Úkraínsk yfirvöld segja að téténskar hersveitir hafi verið sendar aftur heim til Grosní, höfuðborgar Téténíu eftir að hafa fengið hörmulega útreið í stríðinu í Úkraínu. Téténsku hermennirnir höfðu verið sendir til Úkraínu til að berjast með rússneska innrásarliðinu og kannski ekki síst til að reyna að hafa sálfræðileg áhrif á úkraínsku varnarsveitirnar því þær téténsku eru orðlagðar fyrir grimmd og mikla bardagahæfni.

En eitthvað virðist þetta vera ofsögum sagt því hersveitir þeirra eru sagðar hafa orðið fyrir miklu mannfalli í bardögum við úkraínsku varnarsveitirnar og hafi misst mörg hundruð hermenn á fyrstu þremur vikum stríðsins.

Téténsku hermennirnir komu til Úkraínu fljótlega eftir að Rússar réðust inn í landið. Þremur dögum eftir að innrásin hófst féll Magomed Tushayev, hershöfðingi, þegar hersveitir þeirra reyndu að ná Gostomelflugvellinum á sitt vald. Úkraínska leyniþjónustan segir að nokkur hundruð téténskir hermenn hafi fallið í bardögum um flugvöllinn.

Myndir voru síðan birtar af því sem virtist vera stór herflutningalest téténskra hersveita norðan við Kyiv og myndband af loftárás á lestina. Fjöldi farartækja eyðilagðist í árásinni.

Ramzan Kadyrov, forseti Téténíu, hefur þvertekið fyrir að mikið mannfall hafi orðið hjá hersveitum hans. Á Telegram skrifaði hann að tveir hermenn hefðu fallið og sex særst.

Rétt er að hafa í huga að þær tölur sem stríðsaðilar setja fram um fjölda látinna og fallinna hafa ekki verið staðfestar af óháðum aðilum.