Í gær tilkynnti Joe Biden, Bandaríkjaforseti, um bann við innflutningi á rússneskri olíu og olíuvörum til Bandaríkjanna.  Bretland og ESB tilkynntu í gær að dregið verið úr notkun rússneskra orkugjafa og ætlar ESB til dæmis að draga úr kaupum á gasi frá Rússlandi um 2/3 hluta fyrir áramót. Þetta mun koma mjög illa við rússneskt efnahagslíf og gera Pútín erfitt fyrir með að fjármagna stríðið í Úkraínu.

Þetta sagði Fellming Splidsboel Hansen, sérfræðingur í málefnum Rússlands hjá Dansk Institut for Internationale Studier, í samtali við Jótlandspóstinn.

Hann sagði að í heildina líti þetta ekki vel út fyrir Pútín. Nú verði Rússar að finna nýja kaupendur að olíu og gasi og það sé ekki eitthvað sem gerist bara á einni nóttu. Það sé ekki bara hægt að geyma þessa orkugjafa og síðan þurfi að leggja nýjar leiðslur til að geta beint olíu og gasi til annarra móttakenda. Til þess þurfi langtíma fjárfestingar. „Þetta verður stórt vandamál fyrir Rússland,“ sagði Hansen.

Þá er einnig spurning hvernig Pútín getur fjármagnað stríðsreksturinn nú þegar miklu minni tekjur koma inn vegna sölu á olíu og gasi. Sagði Hansen að þar safnist nú svört ský yfir höfði Pútín. „Ég held að Pútín muni verða fjárvana. Líkurnar á þjóðargjaldþroti, eins og við höfum séð í Argentínu og Grikklandi, eru kannski ekki svo miklar því skuldir ríkisins eru að mestu innlendar. Það þýðir að landið getur haldið áfram rekstri en líklega verður að prenta fleiri peningaseðla sem aftur veldur því að verðbólgan eykst mikið. Þegar ríkið skortir peninga getur það haft í för með sér að laun verði lækkuð, að sagt verði við almenning að nú fái hann aðeins laun í 10 eða 11 mánuði á ári í staðinn fyrir mánaðarlega. Í slíkri stöðu er hætta á að almenningur snúist gegn Pútín,“ sagði Hansen.