Hér er yfirlit yfir helstu atburði næturinnar og verður fréttin uppfærð eftir því sem nýjar fréttir berast.
Uppfært klukkan 07.09 – Sir Chris Deverell, sem var yfirmaður bresku herstjórnarinnar árum saman, segir í færslu á Twitter að NATO þurfi hugsanlega að berjast gegn Rússum fyrr eða síðar. Umræðan um flugbann yfir Úkraínu hefur verið hávær en NATO hefur ekki viljað verða við óskum Úkraínu um að setja á flugbann yfir landinu. Deverell segist hafa verið sammála því að setja ekki á flugbann en hafi nú skipt um skoðun og segir að það geti reynst nauðsynlegt. Það sé þó aðeins rétt að setja flugbann á ef Vesturlönd séu um leið tilbúin til að senda landher til Úkraínu. Hann segir að Pútín muni væntanlega svara þessu með hótunum um að beita kjarnorkuvopnum en þær hótanir verði væntanlega innistæðulausar.
I have been against the imposition of a no fly zone by NATO in Ukraine, believing that it would surely escalate the conflict. But Putin seems hell bent on escalation. So the question is becoming: does NATO fight him now or fight him later? #SlavaUkraini #NATO #NoFlyZone
— Sir Chris Deverell (@chris_deverell) March 6, 2022
Uppfært klukkan 07.04 – Breska varnarmálaráðuneytið segir í yfirlýsingu að líklegt megi telja að Rússar muni nú bæta í ásakanir sínar um að Úkraínumenn séu að þróa kjarnorku- og efnavopn. Þetta sé gert til að reyna að réttlæta innrásina.
Uppfært klukkan 06.21 – Yfirstjórn úkraínska hersins segir að höfuðborgin Kyiv sé enn á valdi Úkraínumanna og það sama eigi við um borgina Tjernihiv. BBC skýrir frá þessu. Fram kemur að yfirmaður hersins hafi sagt að rússneskir hermenn stundi rán og rupl í vaxandi mæli og virði alþjóðlegar reglur um stríðsrekstur að vettugi.
Uppfært klukkan 06.06 – Voldomyr Zelenskyy, Úkraínuforseti, prýðir forsíðu The New Yorker þessa vikuna.
This week’s cover, “Resilience,” by Barry Blitt. https://t.co/lMjdLG5y4R pic.twitter.com/oiRX5Qh2wa
— The New Yorker (@NewYorker) March 7, 2022
Uppfært klukkan 05.23 – SÞ segja að rúmlega 1,7 milljónir Úkraínumanna sé nú á flótta.
Uppfært klukkan 04.56 – Volodymyr Zelenskyy, Úkraínuforseti, hefur undirritað forsetatilskipun um að allir úkraínskir hermenn sem eru við friðargæslu á vegum SÞ skuli koma heim nú þegar. Tilskipunin kveður einnig á um að allar sá úkraínski búnaður sem er notaður af friðargæsluliði SÞ verði sendur strax til Úkraínu.
Uppfært klukkan 04.29 – IBM hefur tilkynnt að fyrirtæki hætti öllum viðskiptum í Rússlandi. Áður höfðu Microsoft og Apple farið sömu leið.
Uppfært klukkan 04.04 – Alexander Novak, varaforsætisráðherra Rússlands, sagði í gærkvöldi að ef Bandaríkin og ESB gera alvöru úr hótunum sínum um að banna innflutning á rússneskri olíu séu Rússar reiðubúnir til að loka fyrir gasstreymið til Evrópu um Nord Stream 1 gasleiðsluna.
Uppfært klukkan 03.35 – Stríðið getur haft miklar afleiðingar fyrir fátækasta fólk heims því verð á matvælum getur hækkað mikið. Þetta sagði David Beasley, forstjóri WFP, í samtali við BBC í gær. Bæði Rússland og Úkraína eru stórútflytjendur á matvælum en þau standa undir um fjórðungi alls útflutnings á hveiti í heiminum og helmingi útflutnings á sólblómaolíu og fræjum.
Uppfært klukkan 03.34 – Dmytro Kulebe, utanríkisráðherra Úkraínu, hefur staðfest að fyrirhugað sé að hann fundi með Sergej Lavrov, utanríkisráðherra Rússlands, í Tyrklandi á fimmtudaginn.
Uppfært klukkan 03.32 – Úkraínski herinn hefur birt daglegt stöðuyfirlit sitt. Í því kemur fram að baráttuandi rússnesku hermannanna sé lítill vegna mikils mannfalls og mikils tjóns á hertólum. Rússneskir hermenn eru einnig sagðir hafa yfirgefið sum svæði sem þeir höfðu á valdi sínu.
Uppfært klukkan 03.12 – Úkraínska varnarmálaráðuneytið segir að nokkrir háttsettir rússneskir herforingjar hafi verið felldir af úkraínska varnarliðinu í bardögum um Kharkiv. Hæstsetti herforinginn, sem var felldur, er Vitalij Gerasimov. Einnig eru margir háttsettir herforingjar sagðir hafa særst.
Uppfært klukkan 03.11 – Emmanuel Macron, Frakklandsforseti, og Olaf Scholz, kannslari Þýskalands, ætla að ræða við Xi Jinping, forseta Kína, í dag um stríðið í Úkraínu. Þetta er að sögn BBC merki um aukinn þrýsting Evrópuríkja á Kínverja um að hafa aðkomu að lausn málsins.
Uppfært klukkan 03.11 – Linda Thomas-Greenfield, sendiherra Bandaríkjanna hjá SÞ, sagði á fundi öryggisráðsins í gær að heimurinn verði að búa sig undir langvarandi stríð í Úkraínu. Hún sagði augljóst að Pútín, Rússlandsforseti, sé reiðubúinn til að fórna mörg þúsund rússneskum hermönnum til að ná persónulegum markmiðum sínum.
