Verslun Bónuss á Korputorgi verður lokað og því er 30% afsláttur í dag af öllum vörum á meðan birgðir endast.

Greinilegt er að margir ætla að nýta sér þessi afsláttarkjör og tók viðskiptavinur meðfylgjandi myndir þar sem sést að löng röð hefur myndast fyrir utan verslunina. Opnað var klukkan 10 í morgun og má reikna með að það verði opið þar til allt er selt.

„Við þökkum viðskiptin á liðnum árum og bendum um leið á verslun okkar í Spöng og í Mosfellsbæ,“ segir á Facebooksíðu Bónuss þar sem tilkynnt er um lokunina.

Af umræðum á síðunni er greinilegt að fólk á eftir að sakna þessarar verslunar.

„Æjj þetta er besta Bónusbúðin,“ segir einn. „Langbesta búðin,“ segir annar og „Það verður slæmt að missa þessa verslun,“ segir sá þriðji.

„Besta búðin og leitt að þið séuð að missa húsnæðið. Íbúar Grafarvogs, Úlfarársdals og Grafarholts eiga eftir að sakna hennar,“ segir enn einn sem tjáir sig um lokunina.

Af umræðunum af dæma hefur þessi verslun verið í miklu uppáhaldi hjá fólki á svæðinu og þá er kvartað undan aðkomu og fáum bílastæðum við nýja verslun Bónuss í Mosfellsbæ, auk þess sem talað er um að verslunin í Spönginni þurfi á upplyftingu að halda.

Ekki náðist í Guðmund Marteinsson, framkvæmdastjóra Bónuss, við vinnslu fréttarinnar.