Stefán Einar Stefánsson, viðskiptaritstjóri Morgunblaðsins, staðfestir í samtali við DV að Almannavarnir og Landspítali hafi reynt að fá mbl.is til að fjarlægja frétt tengda Covid. Stefán vill ekki fara út í nákvæmar lýsingar á atvikinu en segir: „Þetta tengist atviki þar sem ég stóð vaktina á blaðinu og laut að því að við vorum beðin um að fjarlægja frétt sem var rétt.“
Stefán segir að ekki hafi verið orðið við beiðninni. Hann hefur áhyggjur af þrýstingi yfirvalda á fjölmiðla í faraldrinum:
„Maður veit hins vegar ekkert hvernig aðrir hefðu brugðist við. Þegar fulltrúar stjórnvalda, vísindamennirnir stíga fram og fullyrða að eitthvað sé rangt þá hrökkva flestir í kút. En þegar gengið er á menn og þeir látnir rökstyðja fullyrðingu sína, þá verður það að halda vatni.“
Stefán gagnrýnir orðræðu sóttvarnayfirvalda undanfarið, sérstaklega yfirlýsingar um að Landspítalinn sé kominn að þolmörkum, í pistli á Facebook í gær. Þar segir:
„Á Landspítalanum eru 638 sjúkrarúm og þar er fólki með ólíka sjúkdóma sinnt og einnig þeim sem orðið hafa fyrir alvarlegum slysum. Nú liggja 8 manns á spítalanum vegna Covid-19 en það svarar til 1,25% þeirra sjúkrarúma sem spítalinn heldur úti.
Þrátt fyrir það er eflaust mjög stutt í að landlæknir, forstjóri spítalans og helstu yfirlæknar lýsi því yfir að stofnunin sé komin að þolmörkum og geti ekki meira. Það mun kynda enn frekar undir hræðsluáróðrinum og upplýsingaóreiðunni sem boðið er upp á til þess að hafa stjórn á almenningi.
Margir beina sjónum sínum að fjölmiðlunum í þessu ástandi en þeir mega sín lítils. Þeir eru jafnvel krafðir um að fjarlægja fréttir sem ekki henta málflutningi yfirvalda. Þar er um fréttir að ræða sem eru sannar og réttar og til þess gerðar að upplýsa almenning um raunverulega stöðu mála.“