Órói er meðal Íslendinga eftir fréttir síðustu daga um aukningu innanlandssmita hér á landi. Nýjustu orð Þórólfs Guðnasonar sóttvarnalæknis eru ekki til þess fallin að minnka óróa landsmanna.
Þegar mbl.is spurði Þórólf hvort við gætum veirð á leið í ferli þar sem takmarkanir eru settar á og teknar af næstu 5, 10 eða 15 árin var Þórólfur ekki með góðar fréttir. „Það getur alveg verið svo, það getur enginn sagt með vissu hvernig framtíðin verður,“ sagði Þórólfur.
„Það er það sem við höfum alltaf verið að segja líka, að það er ekki fyrirsjáanleiki í þessu. Það er ekkert nýtt og margir kvarta yfir því að það sé ekki hægt að koma með fyrirsjáanleika í aðgerðum og slíku en það er ekki hægt þegar veiran er ófyrirsjáanleg og það kemur eitthvað nýtt upp á sem breytir því sem maður hélt fyrir einhverjum mánuðum síðan.“
Þórólfur hefur ákveðið að gefa Svandísi Svavarsdóttir heilbrigðisráðherra minnisblað um hertari aðgerðir hér innanlands svo hægt sé að hefta útbreiðslu veirunnar. Hann telur að grípa ætti til aðgerðar eins fljótt og mögulegt er. „Ég tel að ef menn ákveði sig um ákveðnar aðgerðir þá sé ekki eftir neinu að bíða. Þá held ég að menn eigi að láta það taka gildi eins fljótt og mögulegt er.“
Á upplýsingafundinum í dag passaði Þórólfur að landsmenn verði ekki of vongóðir þegar kemur að því hvenær faraldrinum líkur því honum líkur ekki hér fyrr en honum hefur lokið um allan heim.