Öll sýni úr íbúum og starfsfólki á hjúkrunarheimilinu Grund, sem voru skimuð eftir að starfsmaður greindist með Covid-19, reyndust neikvæð. Vísir.is greinir frá. Starfsmenn og íbúar á deildinni A2 voru sendir í skimun í gær eftir að starfsmaður greindist með Covid-19 á mánudag. Sá hafði síðast mætt til vinnu á fimmtudag.
Haft er eftir Sigríði Sigurðardóttur, sviðsstjóra á fræðslu- og gæðasviði, að niðurstaðan sé mikill léttir. Ekki er talin ástæða til að senda fólkið í seinni skimun því langur tími leið frá því það átti samskipti við sýkta starfsmanninn.