Unnsteinn Elvarsson, verjandi manns sem situr í gæsluvarðhaldi í tengslum við andlát Daníels Eiríkssonar, segir að andlátið sé harmleikur í samtali við Vísi um málið. Hann segir að skjólstæðingur sinn eigi erfitt uppdráttar og sé að koma sér niður á jörðina. Þá segir Unnsteinn að maðurinn sem situr í gæsluvarðhaldi haldi því enn fram að um slys sé að ræða.

Greint var frá andláti Daníels um helgina og hefur þá verið sagt að Daníel hafi látið lífið í kjölfar líkamsárásar sem fram fór fyrir utan heimili hans í Kórahverfinu í Kópavogi. „Eins og hann lýsir þessu er þetta fjarri því að vera eins og fyrst kom fram í blöðunum. Hann vill meina að þetta hafi verið slys,“ segir Unnsteinn. „Ömurlegt í alla staði,“ segir hann svo um málið og tekur fram að skjólstæðingur sinn sé í miklu áfalli og miður sín vegna málsins. Auk þess segir Unnsteinn að það sé vilji mannsins að málið verði leyst.

Þrír menn frá Rúmeníu voru handteknir í tengslum við andlátið en tveimur þeirra hefur verið sleppt úr haldi. Þriðji Rúmeninn, skjólstæðingur Unnsteins, hefur verið úrskurðaður í áframhaldandi gæsluvarðhald fram á föstudag. Sá maður hefur, líkt og hinir mennirnir, áður komið við sögu lögreglu.