„Fyrir margt löngu beið fíkniefnalögreglan mín á Keflavíkurflugvelli. Ég var tekin afsíðis í klefa, á mér leitað hátt og lágt, allt í töskunni tekið í sundur og skoðað gaumgæfilega. Ég vissi ekki hvaðan á mig stóð veðrið en fíkniefnalögreglan var sannfærð um að ég væri að flytja inn ólögleg efni. Þegar ég bar um skýringar var svarið einfaldlega: Þú ert systir bræðra þinna!“
Svona hefst færsla sem Ásdís Halla Bragadóttir skrifar á Facebook-síðu sína í dag en hún gaf DV góðfúslegt leyfi til að fjalla um færsluna. „Bræður mínir, blessuð sé minning þeirra, höfðu báðir komist í kast við lögin og útgangspunktur fíkniefnalögreglunnar var sá að allt þetta hyski hlyti að vera eins. Mér fannst örla á vonbrigðum þegar ekkert fannst og mér var hleypt út með trega. Fas yfirvaldsins sýndi að ef það fengi einhverju ráðið þá ætti að loka mig inni. Bara svona til vonar og vara.“
Ásdís segir að þetta hafi niðurlægt hana. „Niðurlægingin var algjör og ég var fullkomlega varnarlaus. Eftir sat tilfinningin um að einstaklingurinn mætti sín lítils þegar yfirvaldið tekur til sinna ráða,“ segir hún í pistlinum.
„Áður en ég legg í hann til Íslands fer ég í Covid próf“
Ástæðan fyrir því að Ásdís segir þessa sögu tengist nýju frumvarpi Samfylkingarinnar. Með frumvarpinu væri hægt að skylda þá sem koma til landsins til að fara í sóttkví í sóttvarnarhúsi.
Ásdís er sjálf stödd í Kaupmannahöfn þessa stundina en í næstu viku leggur hún af stað heim til Íslands. Ásdís var að vinna að verkefni sem hvergi var hægt að vinna að nema í Kaupmannahöfn. „Ég hef unnið frá morgni til kvölds, að mestu ein með sjálfri mér, en reglulega farið í yndislegar í gönguferðir í danska vorinu,“ segir hún í færslunni.
„Eina manneskjan sem ég hef hitt utan vinnunnar er æskuvinkona sem vinnur á leikskóla þar sem allir starfsmenn fara í skimanir til að ekki komi upp hópsmit. Blessunarlega hafa þau vinnubrögð sveitarfélagsins skilað góðum árangri.“
Áður en Ásdís getur gengið um borð í flugvélina til Íslands þarf hún að fylgja ýmsum reglum. „Áður en ég legg í hann til Íslands fer ég í Covid próf og með neikvæða niðurstöðu í farteskinu verður mér hleypt inn í Icelandair vélina, annars ekki. Annað Covid próf bíður mín þegar ég lendi á Keflavíkurflugvelli og svo eitt í viðbót nokkrum dögum síðar. Fjölskyldan heima hefur gert ráðstafanir svo að ég geti farið beint í sóttkví í rými með sérinngangi og baðherbergi sem enginn annar notar.“
„Rifjar upp fordómana sem ég þekki svo vel“
Ásdís segist fylgjast með fréttum hér á landi og sá því fréttir um frumvarp Samfylkingarinnar. Hún segir að ástæðan fyrir frumvarpinu sé einföld. „Fyrir einhverju síðan kom til landsins maður sem virti hvorki reglur um sóttkví né einangrun. Í framhaldinu kom upp hópsmit og mér skilst að það hafi meðal annars gerst vegna þess að starfsmaður á leikskóla mætti til starfa þrátt fyrir að vera með flensueinkenni. Hvorugt er til eftirbreytni.“
Þá segir Ásdís að veruleikin muni því miður alltaf vera sá að einhverjir fari ekki eftir lögum, reglum og tilmælum. „Þær fáu undantekningar mega aldrei verða til þess að öllum verði hegnt. Eitt það besta sem gerst hefur á Íslandi undanfarin ár og áratugi er að við höfum reynt að efla skilning á ólíkum aðstæðum fólks, reynt að auka umburðarlyndi og víðsýni. Reynt að taka á málum af þekkingu en ekki sleggjudómum,“ segir hún í færslunni.
Henni finnst fyrirhugað frumvarp Samfylkingarinnar vera afturhvarf til fortíðar. „En það er ekki bara forneskjulegt heldur ósmekklegur popúlismi. Það rifjar upp fordómana sem ég þekki svo vel. Gengur út frá því að allir sem koma frá útlöndum hljóti að vera eins. Glæpamenn. Línan er einföld: Lokum allt þetta hyski inni. Bara svona til vonar og vara.“
