Danska lögreglan sendi frá sér tilkynningu fyrir stundu þar sem segir að lík Freyju Egilsdóttur Mogensen, íslenskrar konu sem lýst var eftir í gær, sé fundið. Hún var 43 ára. 51 árs fyrrum sambýlismaður hennar hefur verið handtekinn, grunaður um að hafa orðið Freyju að bana.

Lögreglan hóf leit að Freyju í gærmorgun en síðdegis í gær og gærkvöldi fór leitin að beinast að heimili hennar í Veilgårdsparken i Malling. Þar fundust ummerki og hlutir sem benda til að Freyja hafi verið myrt. Ekstra Bladet skýrir frá þessu.

Fyrrum sambýlismaður Freyju var handtekinn klukkan 09.51 í gær og verður færður fyrir dómara klukkan 09.30 í dag þar sem gæsluvarðhalds verður krafist yfir honum. Það var hann sem tilkynnti um hvarf Freyju en grunur lögreglunnar beindist fljótlega að honum segir í tilkynningu frá lögreglunni.

Lögreglan hefur skýrt fjölskyldu Freyju frá því sem komið hefur fram.

Freyja hvarf á fimmtudagskvöld í síðustu viku eftir að hún lauk vinnu þann dag. Í dönskum fjölmiðlum kemur fram að lögreglan hafi upplýsingar um að Freyja hafi hugsanlega farið með lest frá Malling síðasta föstudag um klukkan 08.30. Á laugardaginn fékk vinnuveitandi hennar sms úr síma hennar þar sem hún tilkynnti veikindi. Síðan hafði enginn heyrt frá henni og í gærmorgun var lögreglunni tilkynnt að hennar væri saknað.

Sjá einnig: Vinir og ættingjar Freyju í áfalli yfir hvarfi hennar.

Danska lögreglan leitar að Freyju Egilsdóttur – Hvarf eftir vinnu á fimmtudaginn