Tómast bendir á að þrátt fyrir að í Mogganum segi að omicron sé bara saklaust kvef þá liggi fárveikt fólk á gjörgæsludeild Landspítalans og enn fleiri á smitsjúkdómadeild „. . . þar sem þeim bara fjölgar, og þar sem undanþágugigg á Þorláksmessu hafa varla hjálpað til,“ segir hann.
Því næst segir hann að nú sé starfsfólk spítalans að veikjast í hrönnum og mörg teymi og deildir séu að sligast undan álagi, sem hafi verið ærið fyrir. „Sjálfur hef ég verið í vinnunni sleitulaust í 10 daga og man ekki annað eins á mínum 30 árum sem læknir,“ segir hann.
Hann segir skiljanlegt að „skynsamur sóttvarnalæknir reyni að bremsa faraldurinn með viðurkenndum aðferðum“ og vísar í hópsmit sem kom upp á hjartadeild Landspítalans í gær en sjúklingar á þeirri deild mega illa við COVID-sýkingu að sögn Tómasar.
Hann segir að sumir þingmenn og ráðherrar virðist ekki skilja þetta og vísi sífellt í frelsi einstaklingsins og að stóri bróðir sé að taka allt yfir. „Síðan hvenær getur frelsi einstaklings gengið út yfir frelsi annarra? Það eru jú mannréttindi að sýkjast ekki af sjúkdómi sem getur verið banvænn – sérstaklega ef maður er veikur fyrir. Eða viljum við búa í samfélagi þar sem aðeins þeir sterkustu lifa af? Af hverju skyldu öll lönd í kringum okkur fara leið sóttvarna og verja heilbrigðiskerfi sín? Eru engin mannréttindi þar á bæ – og þeir bara hreinir vitleysingar? Eða eiga þeir ekki varaþingmenn og fyrrverandi héraðsdómara eins og Arnar Þór Jónsson, sem sífellt beitir fyrir sig bulli og fer síðan í mál við fólk sem hefur heilbrigðari skynsemi en hann sjálfur. Allt til að skora pólitískar keilur að hætti Trump. Varasamur varaþingmaður það – sem greinilega hefur aðra hagsmuni í heiðri en heildarinnar,” segir Tómas.
