Þann 6. janúar árið 2014 millifærði Haukur 8.000.000 króna inn á bankareikning Bjarna. Sama dag millifærði Bjarni þá fjárhæði inn á bankareikning í eigu einkahlutafélags síns, Skarðseyrar, sem millifærði fjáræðina svo inn á annan bankareikning sem er í eigu einkahlutafélagsins Árnýjar.
Haukur lagði peninginn inn á Bjarna í þeirri trú að um lán væri að ræða. Lánið hafi átt að vera til skamms tíma en þó var enginn lánssamningur gerður né var samið um nein lánskjör. Haukur gekk ekki hart á eftir greiðslu fyrstu árin eftir lánið en þegar hann og Bjarni lentu í deilu vegna uppgjörs á byggingu fjölbýlishúss á Akranesi þá slitnaði upp úr vinskap þeirra. Félag Bjarna hafði staðið fyrir byggingunni en félag á vegum forsvarsmanns Hauks hafði tekið að sér verklegar framkvæmdir við bygginguna.
Eftir þetta ákvað Haukur að senda Bjarna áskorun um að greiða eða semja um skuldina, það er að segja þessar 8 milljónir sem hann lánaði honum árið 2014. Bjarni brást ekki við áskoruninni og sendi Haukur því aðra tilkynningu þann 22. júlí í fyrra og tilkynnti að skuldin væri fallin í gjalddaga. Þá skoraði hann á Bjarna að greiða skuldina ásamt áfallandi dráttarvöxtum að mánuði liðnum frá tilkynningunni.
Bjarni brást ekki við þessu og því taldi Haukur að nauðsyn væri að efna til málsóknar. Mál Rosenberg ehf. gegn Bjarna Jónssyni vegna skuldarinnar var höfðað í febrúar á þessu ári og var tekið til dóms þann 30. nóvember síðastliðinn.
Þar var Bjarna Jónssyni gert að greiða Rosenberg ehf. 8 milljónir króna með dráttarvöxtum. Þá var honum einnig gert að greiða Rosenberg 400 þúsund krónur í málskostnað.
