Birgir Þórarinsson, sem í september var kjörinn þingmaður Miðflokksins, hefur sagt sig úr flokknum og gengið til liðs við Sjálfstæðisflokkinn. Þingmenn Miðflokksins eru nú aðeins tveir, formaðurinn Sigmundur Davíð Gunnlaugsson, og Bergþór Ólason.
Morgunblaðið greindi frá þessu í dag. Hefur blaðið eftir honum að honum hafi ekki hugnast að vinna með fólki sem treysti honum ekki. Þá heldur hann því fram að unnið hafi verið gegn honum innan flokksins í prófkjörs- og kosningabaráttunni.
Birgir Þórarinsson var áður varaþingmaður Framsóknarflokksins og kom tvisvar inn á þing fyrir Sigurð Inga Jóhannsson í Suðurkjördæmi. Fyrst í hálfan mánuð árið 2010 og svo í tæpa viku árið 2012.
Birgir var svo kjörinn á þing fyrir Miðflokkinn í kosningunum 2017. Þegar nýtt þing kemur saman mun Birgir þá taka sæti á Alþingi fyrir þriðja stjórnmálaflokkinn sinn. Slíkt er ekki óséð í íslenskum stjórnmálum, en heyrir þó til undantekninga.
Háværar sögusagnir gengu manna á milli fyrr í mánuðinum um að ósamstæða væri meðal nýkjörinna þingmanna Miðflokksins. Þá voru niðurstöður kosninganna Miðflokksmönnum óneitanlega mikil vonbrigði, en þeir voru um tíma fjölmennasti stjórnarandstöðuþingflokkurinn á þingi í fyrra.
