Á sjötta tímanum í gær var ekið á 13 ára stúlku í Árbæjarhverfi. Hún var nýkomin út úr strætisvagni. Hún kenndi til eymsla í fæti og var flutt með sjúkrabifreið á bráðadeild.
Á fyrsta tímanum í nótt hafði lögreglan afskipti af ungum manni í annarlegu ástandi í Bústaðahverfi. Hann hafði sparkað upp hurð á fjölbýlishúsi og skemmt hana. Hann glímdi við ranghugmyndir og taldi einhvern vera að elta sig. Hann fékk að fara heim að upplýsingatöku lokinni.
Þrír ökumenn voru handteknir í gærkvöldi og nótt, grunaður um að vera undir áhrifum fíkniefna. Einn þeirra reyndist vera sviptur ökuréttindum og var um ítrekað brot hjá honum að ræða hvað varðar að aka sviptur ökuréttindum. Annar er grunaður um ítrekaðan akstur án gildra ökuréttinda og skjalafals því hann framvísaði ökuskírteini sem er talið vera falsað.
Á tíunda tímanum í gærkvöldi var kona handtekin í apóteki í Kópavogi þar sem hún hafði reynt að svíkja út lyf. Hún er einnig grunuð um að hafa ekið bifreið undir áhrifum fíkniefna og vörslu fíkniefna. Hún var vistuð í fangageymslu.