Aðfaranótt sunnudags breyttist eldgosið í Geldingadölum þannig að nú verða stutt hlé á því og dettur bæði gasstreymi og kvikustreymi þá niður. Síðan koma hrinur sem standa í allt að 15 mínútur. Páll Einarsson, jarðeðlisfræðingur og prófessor emeritus, segir að þetta geti verið merki um að það líði að lokum gossins.

Morgunblaðið skýrir frá þessu í dag. Haft ef eftir Páli að hegðun sem þessi komi stundum fram þegar líður að goslokum en ekki sé reynsla af þessu í hraungosum.

Haft er eftir honum að hléin á gosinu hafi varað allt frá einni mínútu upp í nokkrar mínútur. Í kjölfar þeirra komi hrinur sem standi í allt að 15 mínútur. Hann sagði að þær hafi styst og hafi goshléin lengst á meðan goshrinurnar styttust. Hann sagði að margt geti valdið þessu og of snemmt sé að segja til um hvað valdi þessari breytingu.

Morgunblaðið hefur eftir Magnúsi Tuma Guðmundssyni, jarðeðlisfræðingi, að þessi breytta hegðun geti verið vísbending um að gosvirknin fari minnkandi en einnig geti verið að gosið sé að leita sér að öðrum stað til að koma upp á yfirborðið.