Maður, sem var í fyrra dæmdur fyrir hefndarklám gegn stúlku á átjánda ári, lagði íslenska ríkið í Héraðsdómi Reykjavíkur í vikunni. Málið snérist um það að lögreglan á Suðurnesjum rannsakaði síma hans hvorki með hans leyfi né með úrskurði dómstóla. Íslenska ríkið var dæmt til að greiða manninum 250 þúsund krónur í miskabætur.

Árið 2016 kærði stúlkan manninn fyrir að hóta ítrekað myndbirtingu á nektarmyndum af sér og var maðurinn handtekinn samdægurs. Þegar brot mannsins áttu sér stað var stúlkan á unglingsaldri, en maðurinn tæplega þrítugur. Málið sem maðurinn vann gegn ríkinu í vikunni varðaði upplýsingaöflun lögreglu í því máli.

Eyddi spjallinu fyrir framan rannsóknarlögreglumenn

Í skýrslutöku viðurkenndi maðurinn að hafa verið með myndir af stúlkunni sem hún hafði sent honum. Þar hafi hann einnig opnað spjall á milli sín og stúlkunnar, en eytt því fyrir framan rannsóknarlögreglumenn og verjanda sinn. Þar eiga að hafa verið myndir af stúlkunni sem sýndu kynfæri hennar.

Lögregla vildi fá að rannsaka símann frekar, en maðurinn hafnaði því og neitaði jafnframt að gefa upp lykilorð að símanum. Þá hafi lögregla tjáð manninum að hún ætlaði sér að komast í gegnum læsingar símans, og í kjölfarið gert það við rannsókn málsins, án þess að hafa dómaraúrskurð.

„Það er gott að þú hatir mig“

Á síðasta ári var hann svo dæmdur í þriggja mánaða skilorðsbundið fangelsi í Héraðsdómi Reykjavíkur fyrir 22 skilaboð sem hann sendi stúlkunni. Einnig hélt hann úti vefsíðu sem varðaði „vandræðaleg augnablik“ úr lífi stúlkunnar. Auk þess var hann dæmdur til að greiða stúlkunni 500.000 í miskabætur. Þeim dóm var ekki áfríað. Í dómnum má sjá tugi skilaboða sem hann sendi stúlkunni, en hér má sjá nokkur dæmi:

„En myndirnar eru komnar inna […] svo njóttu þeirra og gerðu það sem þig langar mer er alveg sama“.

„Það er gott að þú hatir mig þá fæ ég ekkert samviskubit þegar myndirnar enda á netinu.“

„Hvað á ég að gera við allar þessar dirty myndir frá þér?“

„Þú veist samt ekki hvað mig hlakkar til að segja sögur um þig […] :-)“

Rannsóknaraðferðir lögreglu ólögmætar

Maðurinn taldi þó lögreglu hafa brotið gegn sér og friðhelgi einkalífsins með rannsóknaraðferðum sínum. Hann taldi sig eiga rétt á miskabótum þar sem lögreglumenn hefðu komist yfir viðkvæmar myndir og persónuleg gögn með ólögmætum hætti. Í dómnum segir að það sé óumdeilt að lögregla hafi án dómsúrskurðar lagt hald  á farsíma mannsins og rannsakað innihald hans án samþykkis stefnanda og án þess að afla til þess úrskurðar dómara.

Ríkið var líkt og áður segir dæmt til að greiða manninum 250.000 í miskabætur. Í dómnum kemur fram að ólögmæt rannsókn lögreglunnar hefði þó ekki dregið úr sönnunargildi gagnanna sem fundust í símanum.