Fimm skjálftar hafa mælst yfir þrjá á stærð síðan um miðnætti. Sá stærsti var 4,1 klukkan rúmlega tvö í nótt. Alls hafa verið 55 skjálftar yfir 3 á stærð mælst síðustu 48 tímana. Staðfestir hafa verið alls 14.400 skjálftar síðan jarðskjálftahrinan hófst fyrir viku síðan.
Spáin sem sjá má á mynd fréttarinanr var unnin af Kastljósi og má sjá líkan sem sýnir hvað er að gerast undir yfirborði Reykjanesskaga og hvernig kvikugangurinn gæti litið út.
Vonast eftir því besta og búast við því versta eru líklegast fagorð Almannavarna og Veðurstofunnar þessa dagana en það er reynt að gera viðeigandi ráðstafanar skuli koma til goss. Búið er að gera spá um hvernig hraun muni flæða og var það sýnt í Kastljósi í gær. Isavia mun loka bæði Keflavíkur- og Reykjavíkurflugvelli en við upphaf eldgoss er 220 kílómetra hringur afmarkaður sem bannar alla flugumferð þar í kring. Sú áætlun yrði í gildi í tiltölulega stuttan tíma, eða þann tíma sem það tekur Veðurstofuna og samstarfsaðila að birta spá um öskusvæði. Um leið og sú spá er útgefin er lokunarhringurinn tekinn af og flugrekendur ákveða hvort þeir vilji fljúga í gegnum þetta spásvæði.
MAST hefur sent frá sér tilkynningu um viðbúnað dýraeigenda í ljósi þess að búið er að lýsa yfir hættu stigi Almannavarna. Tilkynninguna má lesa hér.
Bætt verður við jarðskjálftastöðvum, vefmyndavélum og gasmælum á jarðskjálftasvæðinu og hefur ríkisstjórn ákveðið að láta Veðurstofuna fá auka 60 milljónir til að standa straum af kostnaði við vöktun og mönnun á Reykjanesskaga. Nóg er að gera hjá starfsfólki þar og segir Bryndís Ýr Gísladóttir, náttúruvársérfræðingur, að við getum búist við fleiri skjálftum á næstunni.
Eldfjallafræði og náttúruvárhópur Háskóla Íslands birti færslu á Facebook-síðu sinni þar sem þeir spá fyrir hvað muni gerast ef til eldsumbrota skyldi koma. Þau taka það sérstaklega fram að þau séu ekki að spá því að það gjósi, heldur einungis hvað muni gerast ef það skyldi gjósa.
https://www.facebook.com/Natturuva/posts/2851776521703103
Vísindavefurinn fékk spurningu um hvað sprengigos gæti staðið lengi en það er aðalgosvá Reykjanesskaga. Hann fær frábært svar frá Magnúsi Á. Sigurgeirssyni og Kristjáni Sæmundssyni, jarðfræðingum. Þeir segja að venjulega standi þau ekki yfir lengur en viku en svarið má lesa í heild sinni hér.