Um klukkan 22 í gærkvöldi var tilkynnt um innbrot og skemmdarverk í bílageymslu í Kópavogi. Þar var brotist inn í bílageymslu og inn í bifreið og hún skemmd. Önnur bifreið, sem stóð á bifreiðastæði utan við húsið, var einnig skemmd. Tilkynnandi sá tvo menn hlaupa á brott.

Þrír ökumenn voru handteknir í gærkvöldi og nótt, grunaðir um að vera undir áhrifum áfengis og/eða fíkniefna.

Einn ökumaður var kærður fyrir of hraðan akstur í Ártúnsbrekku í gærkvöldi. Hraði bifreiðar hans mældist 135 km/klst en leyfður hámarkshraði er 80 km/klst.

Á tólfta tímanum voru þrír einstaklingar handteknir í Grafarvogi, grunaðir um vörslu fíkniefna. Fólkið var vistað í fangageymslu.