Íþrótta- og tómstundasvið Reykjavíkurborgar hefur nú til skoðunar andlát í Sundhöll Reykjavíkur á fimmtudaginn síðastliðinn. Fannst þá 31 árs gamall maður hreyfingarlaus á botni innilaugar Sundhallarinnar þar sem hann hafði legið í 6 mínútur. Samkvæmt upplýsingum sem DV hefur eftir lögreglunni var maðurinn endurlífgaður og fluttur á sjúkrahús þar sem hann lést síðar.
Í viðtali við Morgunblaðið í morgun sagðist faðir hins látna ósáttur við yfirlýsingar lögreglunnar um að látinn sonur sinn hafi glímt við undirliggjandi sjúkdóma. Sagði hann það ljóst að hægt hefði verið að bjarga honum hefði einhver komið að honum fyrr. Gagnrýndi faðirinn harkalega aðbúnað Sundhallarinnar í Reykjavík og spurði hvernig það geti gerst að maður liggi hreyfingarlaus í svo langan tíma áður en hans varð vart.
DV spurði Íþrótta- og tómstundasvið Reykjavíkurborgar fyrr í dag um öryggisbúnað í sundlaugum Reykjavíkur. Sagði Ómar Einarsson sviðsstjóri að hann vissi til þess að myndavélakerfi væri virkt í sundlaugunum, en gat ekki sagt til um stöðu á hreyfiskynjurum sem eiga að gera sundlaugarvörðum viðvart liggi eitthvað, eða einhver, í lauginni hreyfingarlaus í meira en 15 sekúndur.
Í tilkynningu frá ÍTR sem DV barst rétt í þessu segir að málið sé nú til skoðunar sem muni halda áfram næstu daga. Þá segir að Menningar-, íþrótta og tómstundaráði hafi verið gerð grein fyrir málinu.
„Í öllum sundlaugum í Reykjavík eru öryggismyndavélar,“ segir í tilkynningunni. „Í Sundhöllinni eru einnig myndavélar með upptökubúnaði sem sýna yfirlitsmynd yfir laugarsal Sundhallarinnar. Í Sundhöllinni er laugarvörður á vakt hverju sinni í innilaug og annar í laugarvarðarturni með yfirsýn yfir útilaug og öryggismyndavélar.“
Segir í tilkynningunni að laugarvörður hafi verið í sal innilaugar Sundhallarinnar þegar slysið varð og laugarvörður í turni. Sem áður sagði lá maðurinn hreyfingarlaus á botni innilaugarinnar í sex mínútur.
„Lögreglan fer með rannsókn málsins og er lögreglan með upptökur úr öryggismyndavélum Sundhallarinnar.“
DV greindi frá því fyrr í dag að niðurstöðu krufningar væri nú beðið en hennar væri þörf til þess að komast að dánarorsök. Það væri jafnframt fyrsta skref í rannsókn lögreglunnar, sem væri nú á frumstigi.
Sjá nánar: Rannsókn lögreglu á mannsláti í Sundhöllinni á frumstigi – Krufning á næstu dögum
