Kristinn Hrafnsson, ritstjóri Wikileaks, birti í gærkvöld pistil í tilefni fregna um að bandarísk stjórnvöld hafi árið 2011 fengið leyfi hjá íslenskum yfirvöldum til að búa til fölsuð trúnaðargögn í tengslum við rannsókn á Julian Assange, stofnanda Wikileaks. Þekktur hakkari er sagður hafa matað Assange með fölsuðum gögnum. (Sjá vef RÚV).
Bandarísk yfirvöld vilja fá Assange framseldan til Bandaríkjanna fyrir meint brot á njósnalögum vegna gagnaleka Wikileaks um framferði bandaríska hersins í Afganistan og víðar. Assange er sagður hafa notast við þjónustu Sigurðar Þórðarsonar, Sigga hakkara, við að komast yfir leynigögn, en hann ber vitni fyrir bandaríska dómsmálaráðuneytið.
Kristinn segir í grein sinni að ferill Sigga hakkara sé eins og tékklisti yfir hegningarlögin þar sem búið sé að haka við alls konar afbrot:
„Það er með ólíkindum og algerlega ólíðandi ef íslensk yfirvöld hafa tekið þátt í vitfirrtri eftirför Bandaríkjamanna gegn Julian Assange og WikiLeaks. Það er hins vegar skiljanlegt að þessi stjórnlausa maskína vestra hafi tekið í sína þjónustu Sigurð Inga Þórðarson, mann með sakaskrá sem er eins og tékklisti yfir hegningarlögin þar sem búið er að haka við fjölda ákvæða, samkvæmt fyrirliggjandi dómum. Lygar, þjófnaður, blekkingar, falsanir, kynferðisbrot gegn fjölda drengja undir lögaldri. Dómkvaddur sérfræðingur úrskurðaði að siðblinda hrjáði manninn. Sakhæfur engu að síður. Þetta er „stjörnuvitni“ bandaríska dómsmálaráðuneytisins í hælbitinu og hæfir skel kjafti.“
„Þegar leið að framhaldi dómsmeðferðar í framsalsmáli Julians í London síðasta sumar snaraði ameríska saksóknin fram uppfærslu á áður uppfærðu ákæruskjali. Það var algerlega breytt í allri framsetningu, engin ný ákæruatriði en ótrúleg samsuða af dylgjum og óhróðri sem áttu að sýna fram á að Julian væri ótíndur skaðamaður. Ein helsta heimildin var Sigurður Ingi (sem skv þjóðskrá hefur nú týnt millinafninu).
Svo mikil var breytingin á skjalinu að það varð að gefa út nýja framsalsbeiðni og þar með nýja handtökuskipun í Bretlandi. Í fangaklefa í London síðsumars var Julian leystur úr haldi og handtekinn strax aftur í súrealískri athöfn í þessari dauðakómedíu.“
„Til að hefja þetta yfir allan vafa fólum við Julian lögmanni á Íslandi að leita upplýsinga hjá opinberum embættum um hvort við hefðum á einhverjum tíma frá 2009 til dagsins í dag verið til rannsóknar eða haft réttarstöðu sakborninga eða grunaðra í einhverju sakamáli á Íslandi. Svar hefur nú borist frá Lögreglunni á höfuðborgarsvæðinu og frá embætti Héraðssaksóknara (og forvera þess) þar sem staðfest er að svo sé ekki og hafi ekki verið.“
https://www.facebook.com/kristinn.hrafnsson.9/posts/10158848942852964
