Helgi Már Magnússon, framkvæmdastjóri fiskvinnslufyrirtækisins Hattur Seafood, var í síðustu viku fyrir Héraðsdómi Reykjaness sakfelldur fyrir óvenjuleg fjársvik. Fyrir mistök starfsmanns Íslandsbanka var yfirdráttarheimild Hattar Seafold skráð 26 milljónir í stað 2,6 milljóna. Helgi Már nýtti sér villuna með þeim hætti að hann millifærði 22 milljónir á eigin reikninga og reikninga vandamanna. Þessi afbrot áttu sér stað seint á árinu 2017.
Í yfirheyrslu lögreglu kvaðst Helgi hafa notað hluta af fénu til að borga skuld við handrukkara.
Helgi var einnig ákærður fyrir umferðarlagabrot og fyrir neyslu og vörslu fíkniefna.
Fólkið sem hann lagði inn á hjá, systir hans, þáverandi sambýliskona og mágur, var einnig ákært fyrir peningaþvætti en þau voru öll sýknuð.
Helgi neitaði sök og bar við að hann hefði talið yfirdráttarheimild fyrirtækisins hafa hækkað svo mikið, þ.e. upp í 26 milljónir. Í dómnum segir hins eftirfarandi um þetta atriði:
„Ákærði kvaðst sjálfur hafa haft allt frumkvæði að því að yfirdráttarheimild bankans var hækkuð og hefði m.a. gert sér ferð í bankann til að rita undir pappíra vegna þess. Þá vissi ákærði enn fremur að systir hans hafði undirgengist sjálfskuldarábyrgð fyrir þeirri lánveitingu og að fjárhæðin skyldi vera 2,6 milljónir en ekki 26 milljónir. Ákærða mátti því vera ljóst að hin mun hærri heimild sem hann sá á reikningum bankans væri til komin fyrir mistök, enda kvaðst ákærði ekki hafa trúað því í reynd og millifærði því í tilraunaskyni fyrst 2 milljónir út af reikningum félagsins og þegar hann sá að það gekk millifærði hann 20 milljónir til viðbótar. Verður því ekki litið öðruvísi á en svo að ákærði hafi með háttsemi sinni nýtt sér með óforsvaranlegum hætti þá aðstöðu sem hann var í, þegar hann tók út af reikningum félagsins yfirdrátt sem félagið hafði fengið fyrir mistök. Þá verður að líta svo á að þær aðgerðir ákærða að flytja féð af sínum bankareikningi yfir á bankareikninga annarra einstaklinga, til þess að þeir tækju peningana svo út í reiðufé og afhentu sér aftur, séu til marks um það að ákærði hafi gert sér grein fyrir því að háttsemi hans var bæði röng og ámælisverð. Auk þessa hefur ákærði játað að hafa nýtt hluta þeirra peninga sem hann komst yfir með þessum hætti til greiðslu skulda sinna við handrukkara.“
