Björg Ólavía Ólafsdóttir, sem saknað hefur verið síðan á mánudag, fór að heiman frá sér með tvær til þrjár ferðatöskur. Hún fór á bíl sínum sem er grár tvílitur Hunday Santa Fe, með skráningarnúmer TR310.
Systir Bjargar segir í samtali við DV að mynd sem birt hefur verið af bíl í tilkynningu lögreglu og fréttum fjölmiðla af málinu sé villandi. Bíllinn sé ekki silfurgrár eins og myndin sýni heldur ljós að ofan og dekkri er neðar dregur. Ekki er til ljósmynd af bílnum.
Björg býr með móður sinni í Hlégerði í vesturhluta Kópavogs. Þaðan fór hún um um fjögurleytið síðdegis á mánudaginn. Að sögn móðurinnar, sem ræddi stuttlega við DV, kvaddi Björg orðalaust og hafði þegar pakkað niður í töskurnar þegar móðir hennar var vör við þær. Að sögn móðurinnar sagði Björg ekkert er hún fór að heiman og kvaddi ekki.
Samkvæmt frétt á mbl.is er skipulögð leit ekki enn hafin þar sem ekki er búið að afmarka leitarsvæði til að hefja leit á. Gerð var leit að bíl Bjargar í Heiðmörk í gær en án árangurs.
Björg birti opna færslu á Facebook-síðu sinni á mánudaginn, sama dag og hún hvarf. Færslan er persónuleg en óljós, en ber þó vitni um nokkurt uppnám.
Björg er fædd árið 1971. Hún er 171 cm á hæð, þrekvaxin og með brúnt axlasítt hár. Hún er klædd í svarta úlpu. Þeir sem geta gefið upplýsingar um ferðir Bjargar eða vita hvar hún er niðurkomin eru beðnir um að hafa samband við lögregluna í síma 112.
