Eins og kom fram í kvöldfréttum RÚV í gærkvöld er verið að kanna hvort sýnatökupinnar sem stoðtækjafyrirtækið Össur hefur á lager geti nýst í sýnatöku vegna kórónuveirunnar en skortur á sýnatökupinnum er nú farinn að hamla mjög sýnatökum, þeim hefur fækkað á Veirufræðideild Landspítalans og þær hafa stöðvast í bili hjá Íslenskri erfðagreiningu.
DV hafði samband við Össur vegna málsins í dag. Kom þá í ljós að ranghermt var hjá RÚV að pinnarnir væru 100.000, þeir eru aðeins um 20.000, sem þó væri góð búbót. Ekki er komið í ljós hvort pinnarnir uppfylla kröfur sóttvarnalæknis.
Edda Heiðrún Geirsdóttir, markaðsstjóri hjá Össur, var til svara:
„Jú það er rétt, eins og kom fram í kvöldfréttum RÚV í gær er verið að kanna hvort pinnar sem við eigum til á lager gætu hentað til sýnatöku fyrir kórónuveiruna. Ólíkt því sem kemur fram í fréttinni er ekki um 100.000 pinna að ræða heldur u.þ.b. 20.000. Hins vegar er alls óvíst hvort þessir pinnar munu uppfylla kröfur sóttvarnalæknis. DeCode er núna að prófa virkni pinnanna og við væntum svars á næstu dögum. Á meðan stillum við væntingum í hóf en það yrði að sjálfsögðu mikið ánægjuefni ef við gætum aðstoðað.“