Jón Vilhjálmsson rafmagnsverkfræðingur lést á líknardeild Landspítalans á föstudaginn, 65 ára gamall. Frá þessu er greint í Morgunblaðinu í dag.
Jón lauk stúdentsprófi frá Menntaskólanum við Tjörnina árið 1975, prófi í rafmagnsverkfræði frá HÍ 1979 og meistaraprófi í rafmagnsverkfræði frá tækniháskólanum í Atlanta í Bandaríkjunum árið 1980.
Jón starfaði lengi hjá Orkustofnun. Hann stofnaði verkfræðistofuna Afl árið 1987 og rak hana til ársins 2008. Hún sameinaðist öðrum stofum í eina, Efla, þar stýrði Jón orkusviði fram á þetta ár.
Jón starfaði að félagsmálum, meðal annars vann hann fyrir barna- og unglingaráð knattspyrnudeildar Fylkis.
Eftirlifandi eiginkona Jóns er Jóhanna Rósa Arnardóttir félagsfræðingur. Þau eiga soninn Vilhjálm og stjúpbörn Jóns eru Svavar og Erna Dís.
Útför Jóns Vilhjálmssonar verður frá Árbæjarkirkju þann 23. nóvember kl. 13 og verður henni streymt á Youtube.
https://www.youtube.com/watch?v=JLunPCX_xik
