Peningastefnunefnd Seðlabanka Ísland (SÍ) hefur ákveðið að halda vöxtum SÍ óbreyttum svo meginvextir bankans, vextir á sjö daga innbundnum innlánum, verða áfram 1%.

Í tilkynningu SÍ segir að hátíðnivísbendingar og kannanir hafi bent til að hægt hafi á vexti eftirspurnar í lok sumars. Vegna aukinnar útbreiðslu kórónuveirunnar undanfarið hafi efnahagshorfur versnað frá því sem ráð var gert fyrir í ágúst, óvissan sé mikil og muni þróun efnahagsmála ráðast töluvert af framgangi faraldursins.

Verðbólga sé meiri en spáð var í ágúst og gæti enn áhrifa gengislækkunar krónunnar á verð innfluttrar vöru.

Lægri vextir sem og aðrar aðgerðir SÍ í vor hafi stutt við innlenda eftirspurn. Áhrif þessa eigi þó enn eftir að koma fram að fullu og muni áfram styðja við þjóðarbúskapinn og stuðla að hraðari efnahagsbata.

Verðbólgan jókst milli ársfjórðunga og mældist 3,2 prósent á þriðja fjórðungi ársins. Þetta er meira en spár gerðu ráð fyrir. Slaki í þjóðarbúskapnum muni þó að óbreyttu leiða til að verðbólga hjaðni þegar áhrif gengisveikingar fjara út. Verðbólguvæntingar til meðallangs og langs tíma hafi hins vegar lítið breyst.