Þórólfur Guðnason sóttvarnalæknir leiðrétti misskilning um viðhorf sín til kórónuveirufaraldursins á upplýsingafundi dagsins. Hann sagði að menn hefðu skilið það orðfæri hans, að við þyrftum að lifa með veirunni, á þann hátt að honum þætti eðlilegt að veiran gengi yfir samfélagið. Það telji hann ekki. Hins vegar þurfum við að læra að lifa með þeim ráðstöfunum sem eru í gildi til að halda veirunni niðri.
Hann sagðist hins vegar vera andsnúinn því að herða og slaka til víxl á takmörkunum. Nauðsynlegt væri að slaka hægt og sígandi á þeim takmörkunum sem eru í gildi.
Þórólfur sagðist telja líklegt að við verðum að búa við veiruna næstu mánuði og jafnvel lengur.
Sex innanlandssmit greindust í gær, þar af greindist eitt í Vestmannaeyjum. Þrír af þessum sex voru í sóttkví. Ekki hefur fengist staðfest með raðgreiningu að öll smit dagsins tengist sömu hópsýkingu og glímt hefur verið við undanfarið en það er líklegt.
Þórólfur sagði að búast mætti við að sjá fleiri innanlandssmit úr þessari hópsýkingu en veiran úr henni hafi dreift sér víða.
Þórólfur sagði að margir hefðu verið skimaðir hjá veirufræðideildinni í gær og hafi flestir eða allir verið með einkenni. Aðeins 0,9% skimaðra reyndust vera með veiruna og sýni þetta að margar aðrar veirur og sýkingar séu í gangi í samfélaginu.
