Lögreglan á höfuðborgarsvæðinu hefur tilkynnt um malbikunarframkvæmdir á Kjalarnesi næstu tvo daga:
„Á morgun og þriðjudaginn 7. júlí er stefnt á að malbika Vesturlandsveg á Kjalarnesi rétt norðan Brautarholtsvegar (Grundarhverfis) og 1700 m til norðurs báðar akbrautir.
Þrengt verður um eina akrein og viðeigandi merkingar settar upp.
Athugið að umferð verður handstýrt á eina akrein og má búast við umferðatöfum.
Áætlað er að framkvæmdirnar standi frá kl. 08:30 til kl. 23:00, báða dagana.
Vegfarendur eru beðnir um að virða merkingar og hraðatakmarkanir og sýna aðgát við vinnusvæðin. Vinnusvæðin eru þröng og menn og tæki eru við vinnu mjög nálægt akstursbrautum.“
Banaslys varð á hluta þessarar leiðar sunnudaginn 28. júní er tvö mótorhjól skullu á húsbíl með þeim afleiðingum að miðaldra hjón létu lífið. Slysið er rakið til mikillar hálku sem varð þar á ný malbikuðum vegarkafla. Ástæður hálkunnar eru taldar vera of hátt magn biks í efnisblöndunni en það liggur ekki fyrir.
Samkvæmt heimildum DV var malbikið fræst upp og nú á að leggja nýtt efni á.