Aðalmeðferð í máli leikarans Atla Rafns Sigurðssonar gegn Persónuvernd hófst í Héraðsdómi Reykjavíkur í morgun. Krefst Atli þess að úrskurði Persónuverndar þess efnis að samstarfskonur Atla Rafns sem kvörtuðu undan honum njóti nafnleyndar verði hnekkt.

Farið er yfir málið á vef Fréttablaðsins. Forsagan er sú að Atla Rafni var sagt fyrirvaralaust upp störfum hjá Borgarleikhúsinu í desember árið 2017 á grundvelli ásakana um kynferðislega áreitni. Atli Rafn fór í mál við leikhúsið og Kristínu Eysteinsdóttur þáverandi leikhússtjóra og í október árið 2019 var leikhúsið dæmt til að greiða honum 5,5 milljónir króna í bætur.

Atli Rafn fékk aldrei að vita innihald ásakananna né nöfn ásakenda. Atli Rafn leitaði til Persónuverndar og óskaði eftir atbeina stofnunarinnar um að hann fengi aðgang að þessum upplýsingum. Persónuvernd úrskurðaði Borgarleikhúsinu í vil á þeim forsendum að hagsmunir þeirra sem kvörtuðu undan honum um að njóta nafnleyndar ættu að vega þyngra en hagsmunir  hans að fá upplýsingar um mál sem hann snertir.

Í stefnu Atla gegn Persónuvernd segir meðal annars að ef þessi niðurstaða Persónuverndar verði staðfast sé komin leið til að vega að mönnum úr launsátri, svipta þá atvinnu og æru, allt í skjóli nafnleyndar.