„Hér var allt brotið og bramlað og stolið verðmætum fyrir allt að 10 milljónir króna, ef ekki meira,“ segir einn af eigendum skemmtistaðarins Spot í Kópavogi, en brotist var inn á staðinn í nótt. Brotin var rúða baka til (sjá mynd) og síðan farið um staðinn.

Mikið var haft fyrir því að losa þunga hluti og fjarlægja af staðnum, meðal annars voru teknir hátalarar úr lofti, en auk þess ljós og ljósabúnaður, magnarar, sjónvörp, skjávarpar, verkfæri og ýmislegt fleira. Auk þess voru skemmdarverk unnin á staðnum.

Eigendur hafa staðið í miklum endurbótum á staðnum sem þeir voru farnir að sjá til lands í þegar þetta ömurlega áfall reið yfir í nótt. Þeir segja ljós í myrkrinu að treyja sem tilheyrir hinum ástsæla tónlistarmanni, Sjonna heitnum Brink, var ekki tekin.

Óskað er eftir upplýsingum um málið í síma 821 6921 og er möguleiki á fundarlaunum fyrir upplýsingar sem vísa á þýfið.