Samkvæmt fréttatilkynningu frá Flugfreyjufélagi Íslands er algjör einhugur meðal félagsmanna að hafna útspili Icelandair frá 10. maí. Í því útspili fólst tugprósenta launalækkanir og skerðingar á réttindum til frambúðar.

Í tilkynningu segir:

„Stjórn FFÍ kannaði afstöðu félagsmanna á fundi nú í hádeginu og eru félagsmenn með öllu mótfallnir því að umturna gildandi kjarasamningi á einu bretti og fórna kjörum og réttindum sem hefur tekið áratugi að byggja upp.“

FFÍ ítrekar þó samningsvilja sinn um að koma til móts við Icelandair á meðan á núverandi ástandi varir og segist tilbúið til samtals um sanngjarnar breytingar á gildandi kjarasamningi.