„Tengdadóttir mín er með fatla, hún fékk líka þungt högg og er með rosalegan höfuðverk. Syni mínum er illt í hnénu. En þeim líður í sjálfu sér ágætlega og guð sé lof þá virðast þau hafa sloppið vel frá þessu. Eru óbrotin en vonandi kemur ekki eitthvað alvarlegt í ljós síðar. Svona áverkar geta verkið mjög lúmskir,“ segir móðir ungs manns sem lenti ásamt unnustu sinni í hörðum árekstri um ellefuleytið á laugardagskvöld. Bílstjóri jepplings keyrði á þau.

Atvikið átti sérstað rétt hjá Grillhúsinu á Sprengisandi, á gatnamótum Bústaðavegar og Reykjanesbrautar.

„Jepplingurinn skall á þeim en bílstjórinn og farþegi hans stungu af frá vettvangnum á hlaupum,“ segir móðirin.

Móðirin óskar þess annars vegar að fólk sendi syni hennar og tengdadóttur hlýja strauma og hins vegar að allir sem kunna að hafa upplýsingar um atvikið eða eitthvað því tengt hafi samband við lögreglu.

Meðfylgjandi eru myndir af vettvangi. Á annarri þeirra sést bílstjórinn sem flýði af vettvangi en hann er hulinn á myndinni af persónuverndarástæðum.